Fitorja e parë në kualifikime, por nuk dimë për humbje në 14 takime, kryesuam grupin në Ligën e Kombeve – statistikat e Kosovës i lakmojnë edhe përfaqësueset e mëdha

Takimi ndaj Bullgarisë ishte e 14-ti radhazi, në të cilën Kosova nuk njeh humbje. Njëherësh, kjo ishte fitorja e parë e Dardanëve në kualifikimet për një Kampionat Evropian.

Pas tri përballjeve në Grupin A, skuadra jonë numëron dy barazime dhe një fitore, dhe tashmë mund të konsiderohet pretendent për një vend në ‘Euro 2020’.

Kësaj i shtohet edhe suksesi i jashtëzakonshme në Grupin 3 të Ligës D në turneun e ri të UEFA-s, Liga e Kombeve, ku regjistroi katër fitore dhe dy barazime (e kryesoi grupin me pesë pikë më shumë se vendi i dytë).

Lexo po ashtu Të gjitha lajmet nga Përfaqësuesja e Kosovës

Humbjen e fundit, Kosova e ka regjistruar në tetor të vitit 2017 nga përfaqësuesja e Islandës (2-0).

Seria e sfidave pa humbje ka filluar më 13 nëntor 2017 kundër Letonisë, kur në krye të ekipit ishte trajneri Muharrem Sahiti. Kosova e fitoi me rezultat 4-3 dramën e golave në atë përballje.

Strategu zviceran, Bernard Challandes, debutoi me fitore si trajner i Përfaqësueses në triumfin minimal ndaj Madagaskarit në mars 2018 dhe që atëherë e deri më tani e ka udhëhequr skuadrën pa humbje.

Gjatë këtyre 14 sfidave pa humbje, Kosova i ka shënuar 32 gola, i ka pranuar 11 gola, ndërsa në shtatë takime nuk ka pranuar gol.

Më poshtë jua sjellim kundërshtarët dhe rezultatet e Kosovës në 14 takimet e fundit:

Kosova 4-3 Letonia
Kosova 1-0 Madagaskari
Kosova 2-0 Burkina Faso
Shqipëria 0-3 Kosova
Azerbajxhani 0:0 Kosova
Kosova 2-0 Ishujt Faroe
Kosova 3-1 Malta
Ishujt Faroe 1-1 Kosova
Malta 0-5 Kosova
Kosova 4-0 Azerbajxhani
Kosova 2-2 Danimarka
Kosova 1-1 Bullgaria
Mali i Zi 1-1 Kosova
Bullgaria 2-3 Kosova

/Telegrafi/