Zyrtare: Beqir Batatina zgjidhet kryetar i ri i Llapit

Klubi nga Podujeva, Llapi ka zgjedhur Beqir Batatinën si kryetar të ri të klubit.

Para disa javësh Llapi kishte shkarkuar nga detyra e trajnerit Bylbyl Sokolin, ndërsa vendin e tij e kishte zënë Bekim Shotani.

Pas largimit të Sokolit, nga klubi llapjan u larguan edhe disa nga aksionarët dhe donatori kryesor, njëherësh edhe kryetari i klubit Nexhat Dumnica.

Megjithatë, nuk ka vonuar shumë dhe tani Llapi ka zgjedhur kryetar të ri Beqir Batatinën, i cili u votua pro nga të gjithë pjesëtarët e kryesisë së klubit.

Është vet Llapi që e ka bërë publik lajmin me anë të një postimi në profilin e tyre zyrtar në Facebook, teksa ka treguar edhe për ardhjen e disa aksionarëve dhe drejtorëve të rinj në klub.

Postimi pa ndërhyrje i Llapit:

Lajm i madh për tifozët “Legjendat” dhe qytetin e Podujevës, Llapi po vazhdon me konsolidimin

Beqir Batatina zgjedhet Kryetari i ri i klubit

Podujevë, 10 nëntor 2018 – Pas takimit të rregullt ndërmjet kryesisë së klubit “Llapi”, të mbajtur sot me datë 10.11.2018 me qëllim vazdhimin e konsolidimit të klubit me aksionarët e rinjë, Drejtori Ekzekutiv, z. Tahir Batatina në parim propozoi që Kryetar i klubit të zgjedhet z. Beqir Batatina, i cili pas hudhjes në votim u mbështet fuqishëm dhe pa asnjë votë kundër ai nga sot do të jetë Kryetar i KF Llapit.

Poashtu sot u zgjodhën edhe Drejtorët për transfere ndërkombëtare ku për shtetin e Zvicrrës u caktua, z. Bejtush Batatina dhe për Gjermani z. Amrush Batatina, ku fokusi i tyre do të jetë tek talentët llapjan dhe kosovar që të angazhohen në klube europiane dhe të tregojnë cilësitë e tyre.

Drejtori ekzekutiv, Tahir Batatina me këtë rast përshëndeti tre aksionarët e rinjë ku para ndeshjes i prezantoi tek lojtarët së bashku me Kryetarin dhe kërkoj mbështetje maksimale që Llapi të jetë një skuadër stabile dhe e organizuar mirë. Në prezantim mungoi vetëm aksionari Amrush Batatina i cili ishte i angazhuar me ndërrmarjen e tij.

Pra nga sot, aksionarët e rinjë të KF Llapit janë: z. Beqir Batatina, z. Bejtush Batatina dhe z. Amrush Batatina të cilët janë biznismenë të suksesshëm llapjanë me bizneset e tyre përkatëse në Zvicërr e Gjermani.

Me respekt,

Kryesia e KF “LLAPI”, Podujevë

/Telegrafi/