BE kërkon nga Italia të korrigjojë buxhetin

Komisioni Evropian e ka refuzuar projektbuxhetin e Italisë për 2019-në. Roma duhet të paraqesë brenda tri javësh një plan të ri, sepse borxhi i ri i planifikuar i shkel rregullat e stabilitetit.

Ashtu si pritej, Komisioni e refuzoi planin e ri buxhetor të Italisë me borxhin e ri prej 2.4 për qind, të cilin e paraqiti qeveria në Romë. Është hera e parë që një vend anëtar disiplinohet në këtë mënyrë. Kjo është e mundur vetëm që prej vitit 2011, me zgjerimin e kompetencave në Paktin e Stabilitetit me të ashtuquajturin “Sixpack”.

“Më vjen keq që na u desh për herë të parë të kërkojmë nga një shtet anëtar që të rishikojë planin e tij buxhetor”, tha pas mbledhjes me zë varri, Valdis Dombrovskis, Komisari kompetent për Euron. Mungesa e emocioneve është karakteristikë e politikanit nga Letonia. “Sqarimet që morëm ditët e fundit nuk qenë bindëse. Këtu bëhet fjalë për një rast të vështirë të mosrespektimit”, të rregullave të Paktit të Stabilitetit, nuk u pa alternativë tjetër.

Kur një shtet i shkel “hapur dhe me ndërgjegje” këto rregulla, me to shkatërrohet besimi në Eurozonë dhe i gjithë BE dëmtohet, tha Dombrovskis. Italia ka vite që e shkel kufirin e lejuar prej 60 përqind për marrjen e borxheve të reja dhe ka shprehur angazhimin se do t’i ulë në mënyrë sistematike shpenzimet e saj, 0.8 përqind do të kishin qenë të lejuara për të.

“Është tunduese që borxhet t’i luftosh me më shumë borxhe”, tha Dombrovskis.

Por përballë kësaj ai vuri shifrat e thata të Italisë. Niveli i borxheve të Italisë është i dyti në BE, me 131.2 për qind të Produktit Kombëtar Bruto. Me këtë Italia është një nga vendet me borxh më të madh në botë. Vetëm interesat bankare janë kaq të larta sa i gjithë buxheti i arsimit i vendit. Barra e borxheve për frymë në Itali kap shumën 37 mijë euro.

Komisioni tërheq edhe njëherë vëmendjen që Brukseli nuk ia ka mbyllur në asnjë mënyrë Italisë rubinetin e parave. Si marrësi i dytë i fondeve strukturore të BE, Roma ka marrë 45 miliardë euro dhe veç kësaj i janë vënë në dispozicion 8.5 miliardë euro për investime.

Në mbledhjen e tij Komisioni e shtyu çeljen e një procedure për deficitin kundër Italisë. Refuzimi i buxhetit është hapi i parë, u tha; tani qeveria e Romës ka fillimisht tri javë, për të ndërmarrë ndryshime përkatëse, u tha për këtë.

Përgjigjja nga Roma nuk vonoi. Ai do të shkojë personalisht në Bruksel, tha ministri i Brendshëm i Italisë, Matteo Salvini, shef i Legas dhe burri i fortë i qeverisë italiane, për të shpjeguar atje se si do të rritet ekonomia e Italisë në sajë të këtij buxheti. Por një gjë është e qartë, tha ai, “Ne nuk do të heqim asnjë cent nga ky buxhet”. /DW /Telegrafi/