Vidali në ‘luftë’ të hapur me Valverden  

Arturo Vidal dhe trajneri Ernesto Valverde nuk janë duke kaluar aspak mirë mes vete dhe kjo si duket ka ngritur një çështje te klubi i Barcelonës.

Te Barcelona thuhet se ka krisur një ‘luftë e hapur’ në mes të mesfushorit Vidal dhe trajnerit spanjoll Valverdes.

E gjithë kjo sipas mediave spanjolle ka të bëjë me një postim të fundit të kilianit në profilin e tij privat në rrjetin social Instagram.

Lexo po ashtu Vidal i pakënaqur te Barcelona

Postimin e bërë, Vidal e ka fshirë pas një orë, pasi thuhet se ka sulmuar në mënyrë direkte trajnerin e Barcelonës, Valverde, i cili e kërkoi me ngulm në verë duke e transferuar në Camp Nou nga Bayern Munichu.

Blaugranët për këtë transferim i paguan Bavarezëve plot 18 milionë euro plus tre milionë euro tjera bonuse, por trajneri tashmë po e aktivizon shumë pak.

Vetëm 176 minuta apo më pak se dy ndeshje të plota për Vidalin te Barcelona dhe kjo ka bërë që kiliani të lëshojë akuza të forta në drejtim të trajnerit edhe pse nuk e ka përmendur emrin e tij.

Megjithatë, gjithçka të bën të mendosh se akuzat e mesfushorit kanë qenë pikërisht për numrin 1 të stolit të Barcelonës.

“Me tradhtarët nuk luftohet, ata rrëzohen vetë”, ishte shkrimi i Vidalit në Instagram, shkrim i cili thuhet se i dedikohej Valverdes. /Telegrafi/