Rrustemi: Veç Vetëvendosje ka paguar dënimet e shqiptuara nga PZAP

Anëtari i Lëvizjes Vetëvendosje në Komisionin Qendror të Zgjedhjeve, Adnan Rrustemi, thotë se partia e tij është e vetmja që ka shlyer dënimet për shkelje të rregullave në fushatë, të cilat i cakton Paneli Zgjedhor i Ankesave dhe Parashtresave (PZAP).

“Vetëm Lëvizja Vetëvendosje ka shlyer borxhet nga zgjedhjet e fundit, ndërsa partitë tjera parlamentare ende kanë mijëra euro pa paguar nga gjobat e shqiptuara nga PZAP”, ka shkruar Rrustemi, në profilin e tij në Facebook.

“Prandaj, KQZ-ja i ka lëshuar mjetet financiare vetëm për Lëvizjen Vetëvendosje, ndërsa partitë tjera parlamentare mund të marrin mjetet financiare nga fondi i demokratizimit, vetëm kur të kenë shlyer të gjitha obligimet nga zgjedhjet e fundit. Sjellja e përgjegjshme o është kudo, o askund”, ka thënë Rrustemi.

PZAP ka shqiptuar mijëra euro në gjoba për partitë politike për shkeljet që i kanë bërë gjatë zgjedhjeve të fundit parlamentare dhe ato lokale në Kosovë.

Shkeljet kanë qenë të natyrave të ndryshme, përfshirë përdorimin e  fëmijëve në fushata elektorale, thyerje e heshtjes zgjedhore, shfrytëzimin e hapësirave publike për fushatë etj. /Telegrafi/