Panucci: Gjithmonë do të ketë lojtar të rinj te Shqipëria, për Zhegroven vendosi prindi i tij

Trajneri italian i Shqipërisë, Christian Panucci ka zbardhur ditë më parë listën e Kombëtares për ndeshjen miqësoren ndaj Norvegjisë.

Në këtë listë ishin disa lojtarë të rinj si Kristel Abazaj, Enis Gavazaj, Herdi Prenga apo edhe Bujar Lika.

Trajneri i kuqezinjve ka thënë se ka grumbulluar lojtarët e rinj pasi kanë karakteristika interesante.

“Unë jam trajneri i Shqipërisë dhe është normale që të ndjek kampionatin shqiptar. Abazaj dhe Gavazaj janë lojtarë të rinj të talentuar dhe kanë karakteristika shumë të mira dhe mua më pëlqejnë”.

“Ato po paraqiten shumë mirë me skuadrat e tyre dhe unë duhej tua jepja një stimul duke i grumbulluar në ekipin kombëtar. Të gjithë ata që do të paraqiten mirë në kampionatin shqiptar dhe janë futbollistë të rinj në moshë do t’i kenë të hapura dyert e kombëtares”, ka deklaruar Panucci në konferencë për shtyp.

“Kam grumbulluar katër apo pesë lojtarë të rinj për ti parë në stërvitje por edhe për të kuptuar nëse niveli i skuadrës ndryshe nga grumbullimi i mëparshëm në Antalya, do të jetë më i lartë, pasi konkurrenca në skuadër rrit cilësinë”.

Ndër tjera ai ka folur edhe për talentin Edon Zhegrova që zgjedhur ta përfaqësoj Kosovën.

Sipas trajneri italian Zhegrova është ndikuar nga prindi i tij për zgjedhjen.

“Unë e kam kërkuar dhe kam kontaktuar me të, por tashmë është e kotë të flas për këtë çështje sepse ai ka zgjedhur një përfaqësuese tjetër”.

“Ka edhe nga ato raste kur prindërit vendosin për të ardhmen e futbollistit madje edhe duke e shkatërruar atë. Kaq dhe pikë nuk mund të flas më për këtë temë”, ka përfunduar Panucci. /Telegrafi/