Në rast të largimit të Barcelonës nga La Liga, te cila ligë evropiane do dëshironit të vazhdonte garat Barça (Sondazh)

Katalunasit kanë vendosur, ata duan të ndahen nga Spanja.

Në referendumin e organizuar mbi 90 për qind të votueseve votuan për pavarësi të krahinës së Katalunisë.

Kjo në mes të tjerave në aspektin sportiv do të thotë se klubet me bazë në këtë pjesë të Spanjës rrezikojnë të përjashtohet nga La Liga.

Për këtë ishte treguar i qartë presidenti i La Ligas, Javier Tebas, në vitin 2014:

“Rregullat tona njohin një dispozitë të vetme ku thuhet se vetëm një shtet jo spanjoll mund të luajë La Liga dhe garat e tjera spanjolle dhe ai është Andorra”.

Pra, i mbetet Barcelonës të vendos së bashku me drejtuesit e klubit se cilës ligë t’i bashkohen, kështu edhe klubet tjera dhe për këtë presidenti i Barcës, Josep Maria Bartomeu, ka thënë:

“Këtu në FC Barcelona kemi vendosur që ne të duhej të merrnim njëfarë masash për të treguar indinjatën tonë në botë”.

“Ka pasur shumë çështje në diskutim dhe i kemi diskutuar këto me departamentet e ndryshme të klubit: drejtorët, ekzekutivët, trajnerët dhe lojtarët. Katalunia po kalon momente të vështira dhe komplekse. Përsa i përket deklaratës së pavarësisë është një situatë e ndërlikuar dhe që mund të tensionohet në të ardhmen”.

Vlen të theksohet se në ditën e referendumit në Kataluni mbi 840 persona u plagosën nga përleshjet me policinë spanjolle dhe nga kjo klubi i Barcelonës kërkoi që ndeshja ndaj Las Palmas të shtyhet për një datë tjetër. Pastaj kjo u refuzua nga Federata e Spanjës dhe u morr vendimi që të luhet pa tifozë.

Aktualisht janë tre klube në La Liga që vijnë nga Katalunia: Barcelona, Espanyol dhe Girona, të cilët anuluan seancat e tyre stërvitore të parashikuara për këtë të martë.

Në cilën nga ligat e mëdha evropiane do dëshironi të shikoni Barcelonën në rast se largohet nga La Liga, jepni mendimin tuaj nëpërmjet votës. /Telegrafi/