Shkëlqeu në Ligën e Evropës, Rashica drejt transferimit në Serie A

Milot Rashica rikthehet në radarët e Lazios.

Sulmuesi i Vitesses që dha dy asiste në sfidën mes dy skuadrave, ka nisur të përmendet sërish në ambjentin bardhekaltër edhe pse drejtori sportiv, Igli Tare po e monitoron prej shumë kohësh.

Ndeshja pothuajse perfekte e së Enjtes ku Rashica arriti të kalonte disa herë mbrojtësin Lukaku, duket se e ka bindur presidentin Claucio Lotito të investojë tek talenti shqiptar i Përfaqësueses së Kosovës.

Gjatë kësaj vere, Vitesse kërkoi 6 milionë Euro për 21-vjeçarin, shumë që Lazio nuk ishte e gatshme ta paguante por me siguri, paraqitja e sulmuesit të djathtë në ndeshjen ndaj bardhekaltërve e a rritur edhe më shumë vlerën e kartonit të tij.

Gjatë sesionit të merkatos së dimrit, klubi roman mund të bëjë një ofertë zyrtare për ta transferuar në kryeqytet talentin kosovar edhe pse Lazio nuk është gati të shpenzojë shuma marramendëse për lojtarin.

Në krahun tjetër qëndron edhe Napoli, një tjetër skuadër italiane që e ka monitoruar 21-vjeçarin. Një vit më parë, presidenti De Lautrentiis dha disa sinjale se Rashica ishte një nga objektivat e tij por bisedimet mes klubeve nuk nisën asnjëherë dhe sulmuesi i krahut të djathtë mbeti edhe për një sezon te Vitesse.