50 të lënduar në “Beer Fest”, s’dihet kush gjuajti me armë

Pesëdhjetë persona kanë kërkuar ndihmë mjekësore në Klinikën Emergjente si pasojë e lëndimeve të marra nga panikut që ndodhi në “Beer Fest”. Ndërkohë, policia ende nuk ka arrestuar personin që ka gjuajtur me pistoletë, i cili ishte edhe shkaktar i gjithë asaj që ndodhi në sheshin “Zahir Pajaziti”.

Situata u krijua pasi një person në turmën e njerëzve ka gjuajtur me armë, ku pastaj është shkaktuar panik te të pranishmit, të cilët në tentim për t’u larguar kanë lënduar njëri-tjetrin.

Numri më i madh i të lënduarve ishte i gjinisë femërore. Të gjithë të lënduarit pas trajtimit mjekësor janë dërguar në shtëpi, pasi gjendja shëndetësore e tyre ka qenë e mirë. Me lëndime të rënda ka qenë vetëm njëri i cili gjatë ikjes kishte rënë në një xham, por pas trajtimit edhe ai është lëshuar për trajtim mjekësor në shtëpi.

Specialistja e mjekësisë emergjente, Dafina Basholli, ka treguar për KosovaPress, se numri i madh i pacientëve kanë qenë me shenja kontunzive dhe luksacione të ndryshme, të cilat për shkak të turmës dhe ikjes janë shkelur.

“Trajtimi mjekësor është kërkuar nga 50 pacientë të cilët vetëm 39 janë protokolluar në protokoll, se përshkak të turmës gjysma e pacientëve na ikin edhe pa protokolluar. Ka qenë një numër mjaft i madh i pacientëve të cilët kanë qenë me shenja kontunzive dhe luksacione të ndryshme të cilat për shkak ecjes së shpejtë dhe turmës së madhe janë lënduar. Një i ri ka qenë i lënduar, lëndime më të rënda, i cili ka rënë në xham, është trajtuar dhe është dërguar në shtëpi. Të gjithë pacientët janë dërguar në shtëpi, janë në gjendje të mirë të cilët kërkojnë trajtim mjekësor në shtëpi për trajtim t ë mëtutjeshëm”, tha Basholli.

Lexo po ashtu QKUK: 42 të lënduar në sheshin “Zahir Pajaziti” (Video)

Gjatë orët e vona të mbrëmjes së djeshme u raportua që shumë të rinjë ishin pjesë e “Beer Fest”.

Por edhe në Klinikën Emergjente, mjekja Basholli ka treguar se ata të cilët janë lënduar mbrëmë kanë qenë moshat e reja.

“Moshat kanë qenë të reja, shumica e pacientëve kanë qenë femra të cilat për shkak të turmës, apo me siguri të mos aftësisë së ikjes sa më shpejtë, atëherë janë shkelur”, tregoi Basholli.

Nga gjuajtja me armë zjarri nuk është lënduar as një person.

Rasti ndodhi në sy të shumë njerëzve, e as deri në orët e tanishme, Policia e Kosovës nuk ka ndonjë informacion nëse është arrestuar personi që ka gjuajtur me armë.

Zëdhënësi i Policisë së Kosovës, Daut Hoxha, tha se lidhur me rastin janë intervistuar disa persona, dhe se hetimet janë duke vazhduar.