FIFA: Për lojtarët kosovarë do të vendoset veç e veç

Nuk do të ketë një vendim gjithëpërfshirës për futbollistët të lindur apo me rrënjë nga Kosova, që aktualisht luajnë në përfaqësuese tjera dhe që në të ardhmen mund të kenë dëshirë të luajnë për Kosovën.

Këtë e ka bërë të ditur të hënën Federata Ndërkombëtare e Futbollit (FIFA), që është organi kompetent për të vendosur për këtë çështje.

Çështja e lojtarëve të lindur në Kosovë apo me rrënjë nga Kosova, që luajnë për vendet e tjera po vlerësohet si më e ndjeshmja pas pranimit të Kosovës në FIFA e UEFA. Kosova në FIFA u pranua më 13 maj, ndërsa në UEFA më 3 maj.

Lojtarët që potencialisht mund të luajnë për Kosovën nuk janë deklaruar deri më tani, ndërsa Federata e Futbollit të Kosovës planifikonte që me këtë çështje të merret pas kampionatit evropian të futbollit që mbahet prej 10 qershorit deri më 10 korrik në Francë, shkruan kohaditore.

FFK-ja vlerësonte se duhet të lihen lojtarët në fjalë të koncentrohen vetëm për evropian e mos të ngarkohen me gjëra tjera. Rregulloret në fuqi të FIFA-s saktësojnë se një lojtar nuk mund të ndërrojë përfaqësuesen nëse ka luajtur ndeshje zyrtare për seniorë me një përfaqësuese tjetër.

Por lojtarët e lindur në Kosovë apo me rrënjë nga Kosova që luajnë për vende të tjera deri më tani nuk e kishin opsion Kosovën. Kjo është një situatë e re dhe FIFA përkatësisht një komitet i saj do të vendosë në bazë të kërkesave individuale të lojtarëve, nëse ka të tilla..