AFP: Kosova mund ta lë Zvicrën pa më të mirin e saj

Granit Xhaka po vlerësohet si lojtari kryesor i përfaqësueses së Zvicrës në futboll.

Sipas agjencisë së njohur franceze të lajmeve AFP, spekulimet për transferim multi-milionësh për kosovarin, kanë ngritur presionin te ai për të luajtur sa më mirë në Euro 2016.

Xhaka ka pasur 40 paraqitje për Zvicrën dhe nga ish-përzgjedhësi i Zvicrës, Otmar Hitzfeld, është vlerësuar si “Bastian Schweinsteiger i ri”.

Mediat britanike raportojnë se shumë klube angleze janë në kërkim të tij, me Arsenalin që ka ofruar 30 milionë euro, por që klubi gjerman Borussia Monchengladbach kërkon akoma më shumë. Liverpooli dhe Bayerni besohet se po ashtu janë duke vëzhguar lojtarin.

Përballja me vëllanë

AFP ka shkruar se si Granit Xhaka në Euro 2016 do të përballet me vëllanë e tij, Taulantin, që përfaqëson Shqipërinë. Agjencia prestigjioze përmend edhe kohën kur familja Xhaka u largua nga Kosova për shkak të luftës me Serbinë dhe ka kujtuar ndeshjet kualifikuese për Botërorin 2012, kur Zvicra mposhti Shqipërinë 2 me 0.

Në atë ndeshje, AFP kujton se si Xhaka kishte humbur një rast të qindpërqindtë dhe si në Zvicër kishin nisur spekulimet se lojtari e kishte humbur rastin me qëllim, vetëm për të mos shënuar kundër kombëtares shqiptare. Xhaka mund të luajë për Zvicrën kundër Shqipërisë më 11 qershor në Euro 2106.

AFP shkruan më tej se Xhaka ka gjasa të mëdha të kalojë në përfaqësuesen e Kosovës.

“Xhaka po ashtu në shumë intervista ka bërë të ditur se Kosova mund ta inspirojë që të largohet nga Zvicra dhe të luajë për shtetin e origjinës”, shkruan AFP, duke kujtuar se një gjë e tillë mund të ndodhë pasi që Kosova të pranohet në FIFA.

Kosova më 3 maj u pranua si anëtarja e 55-të e UEFA-s dhe më 12-13 maj pritet të vendoset se a do të jetë anëtarja më e re e FIFA-s në Kongresin që do të mbahet në Meksikë.