Kosova gjatë 2014-ës pati normë pozitive të rritjes ekonomike

Presidentja Atifete Jahjaga, priti në takim guvernatorin e Bankës Qendrore të Kosovës, Bedri Hamza, i cili ia dorëzoi raportin për vitin 2014.

Presidentja Jahjaga u njoftua nga guvernatori Hamza se Kosova gjatë vitit 2014 ka mbajtur një normë pozitive të rritjes ekonomike dhe vazhdon të reflektoj nivel të kënaqshëm të stabilitetit fiskal dhe financiar.

Ai tha se Kosova vazhdon të ketë nivel të ulët të deficitit buxhetor dhe të borxhit publik, ndërsa çmimet gjatë vitit 2014 kanë qenë në harmoni me trendët globale dhe me një normë të ulët të inflacionit. Guvernatori Hamza tha se edhe sektori bankar është i qëndrueshëm dhe me shkallë të lartë të kapitalizmit.

Presidentja Jahjaga e vlerësoi punën që po bën Banka Qendrore e Kosovës dhe theksoi nevojën që ky institucion të vazhdojë angazhimin në ruajtjen e qëndrueshmërisë financiare të vendit. Ajo tha se prioritet i institucioneve të vendit është zhvillimi ekonomik, përmes krijimit të kushteve të favorshme të biznesit për investitorët e huaj por edhe për afaristët vendor. /Telegrafi/