Vazhdon importi i energjisë elektrike

Për shkak të ndërprerjeve të paplanifikuara të prodhimit në njësinë A4 të KEK-ut që pritej të kthehet dje në prodhim. KEDS-i ka njoftuar se fatkeqësisht, kjo njësi është ende jashtë prodhimit, dhe nga KEK jemi informuar që janë duke bërë të pamundurën që këtë njësi ta kthejnë në prodhim sot në mesnatë.

“Për më shumë, njësia A5 është në proces të paplanifikuar të riparimit dhe tani më vetëm dy njësi janë aktive në KEK deri sa pjesa tjetër mbulohet me import të energjisë elektrike me qëllim të sigurimit të kapaciteteve të mjaftueshme për furnizim me energji elektrike për konsumatorë”, ka njoftuar KEDS-i.

Çdo devijim i tillë i paplanifikuar nga operatorët tjerë rrezikon edhe furnizimin e rregullt me energji elektrike si dhe i vejnë KEDS-in, KESCO-n dhe konsumatorët në pozitë të keqe, duke qenë se sektori i energjisë është sektor i rregulluar publik.

“Ne kemi ndërmarrë të gjitha hapat që këto ndërprerje të paplanifikuara të njësive prodhuese në KEK të mos ndikojnë në furnizimin e rregullt me energji elektrike për konsumatorë. Pasi që kapacitetet aktuale të disponueshme të energjisë elektrike janë minimale, dhe pasi që sipas planeve paraprake dhe bilancit të aprovuar nga MZHE do të duhej të ishin në prodhim katër njësi në KEK, ndërsa janë aktive vetëm dy, i lusim të gjithë konsumatorët të kursejnë energjinë elektrike”, thekson komunikata e KEDS-it për media /Telegrafi/