Zelensky iu drejtohet ukrainasve: Të durosh këtë vit do të thotë ta durosh të gjithë luftën

Presidenti ukrainas, Volodymyr Zelensky tha mbrëmë se nëse ukrainasit do ta përballojnë këtë vit do të thotë se do të durojnë të gjithë luftën.

Ai tha se prioriteti më i rëndësishëm i ukrainasve mbetet sigurimi i municioneve, dronëve, pajisjeve dhe fuqisë punëtore.

“Të durosh këtë vit do të thotë të durosh gjithë këtë luftë. Është një kohë vendimtare. Falënderoj të gjithë ata që e kuptojnë këtë, që ndihmojnë vendin të bëhet më i fortë dhe që u jep ushtarëve tanë mundësinë për të mposhtur armikun”, tha udhëheqësi i Ukrainës.

Ai tha se luftime të ashpra aktualisht po zhvillohen në pjesën jugore të frontit, si dhe në frontin Marinka, Bahmut, Liman dhe Avdivka.

Ai shtoi se autoritetet ukrainase po punojnë me të gjithë partnerët për të siguruar që Ukraina të marrë një vëllim adekuat të paketave të sigurisë.

“Ne tashmë kemi një hap tjetër mbrojtës nga Gjermania për Ukrainën, duke përfshirë raketa kundërajrore, artileri 155 mm dhe sende të tjera të nevojshme. Faleminderit! Është një paketë në kohë”, tha Zelensky.

Lexo po ashtu “I ngjante një kufome që ecë”: Një libër flet për ‘transformimin e Zelenskyt’ dhe ‘detaje të rutinës në bunkerin e tij’, gjatë javëve të para të luftës

Ai vuri në dukje se pret hapa të ngjashëm nga partnerë të tjerë, përfshirë Shtetet e Bashkuara të Amerikës, për të siguruar që terrori rus nuk mund të mbizotërojë “këtë dimër, siç nuk mundi vitin e kaluar”.

Ndryshe, Ukraina po lufton kundër pushtuesve rusë që nga 24 shkurti i vitit 2022. /Telegrafi/