Vota në OKB: A votoi Rama kundër SHBA-së për të bllokuar reformën në drejtësi?

Vota kundër SHBA në OKB nga Shqipëria vijon të prodhojë debate, pavarësisht justifikimeve që janë dhënë deri më tani nga Qeveria shqiptare përfshi këtu edhe Kryeministrin Edi Rama. Monika Kryemadhi, kryetare e LSI-së, gjatë një interviste televizive hodhi dyshimin se kjo votë kundër mund të ketë lidhje me bllokimin e reformës në drejtësinë nga Edi Rama.

“SHBA deklaruan se kush voton kundër i ndërpriten fondet. Çfarë do të bëjë Edi Rama nëse Presidenti Trump ndërpret fondet për Shqipërinë? Janë 47 milionë euro vetëm për drejtësinë, me çfarë fondesh do e bëjë Edi Rama këtë reformë? Pra mos ndoshta Edi Rama duke e ditur paralajmërimin për bllokim fondesh vendosi të votojë kundër për të bllokuar reformën në drejtësi?”, tha Kryemadhi.

Shqipëria ishte një ndër vendet që u rreshtua pro rezolutës së Turqisë, e cila kundërshtonte njohjen e Jeruzalemit si kryeqytet të Izraelit. Më 6 dhjetor, Presidenti Trump firmosi dekretin për njohjen e Jeruzalemit si kryeqytet të Izraelit, duke paralajmëruar nisjen e procedurave për zhvendosjen e ambasadës amerikane nga Tel Avivi në kryeqendrën e re.

Ndërkohë përmes një pr/rezolute që kongresmenët amerikanë kanë paraqitur në Komisionin për Politikën e Jashtme, i kërkohet Sekretarit amerikan të Shtetit që t’i dorëzojë Kongresit një raport mbi statusin e ndihmës që SHBA u jep vendeve që votuan në favor të rezolutës së Asamblesë të Përgjithshme të Kombeve të Bashkuara.