Vetëm 15% gra në Policinë e Kosovës, krerët e shtetit kërkojnë që pjesëmarrja të rritet

Policia e Kosovës ka lansuar “Agjendën për barazi gjinore dhe planin e veprimit 2021-2023”. Vendimi i tillë u mirëprit nga krerët e shtetit dhe u konsiderua i nevojshëm për vendin.

Presidentja e vendit, Vjosa Osmani tha se si presidente ajo është e përkushtuar jo vetëm ndaj fuqizimit të gruas në përgjithësi, por me theks të veçantë promovimin e tyre në sektorin e sigurisë, duke e parë si parakusht për suksesin e shoqërisë tonë.

“Në qendër të kësaj agjende është barazia, diversiteti dhe të drejtat e njeriut të cilat janë shtyllat mbi të cilat është ndërtuar shteti jonë. Ndër elementet kryesore të sundimit të ligjit është barazia e të gjithëve para ligjit. Siç e dini pabarazi gjinore ndikojnë në shkallën e krimit dhe në viktimat e tij. Këto pabarazi ndikojnë edhe në mënyrën sesi luftohet krimi. Sa më shumë barazi në institucionet e sigurisë, aq më shumë do të mbrohen viktimat dhe po aq shumë do të sjellën para drejtësisë autorët e krimeve”, tha Osmani.

Ajo shtoi se barazia gjinore i ka sfidat e veta dhe se institucioneve ju mbetet që barazinë gjinore ta bëjnë pjesë të angazhimit të tyre të përditshëm.

“Ato gra që dhanë gjithçka që ne të kemi institucione të lira të pavarura e të barabarta janë burim i vazhdueshëm inspirimi për rrugën që kemi përpara. Nuk ka barazi të barabartë, nëse barazia nuk i prek të gjithë sektorët. Ne duhet t’i inkurajojmë gratë që të bëhen pjesë e sektorit të sigurisë. Duhet të shmangim stereotipat e betonuara për sektorin e sigurisë si një sektor i burrave, nuk ka sektor të burrave ka sektor të sigurisë me burra e gra. Të dhënat tregojnë se në Policinë e Kosovës 15% janë gra, në SHKK 13%, në FSK 11% e të tjera. Na mbetet shumë punë që ta rrisim përkushtimin që këto statistika të pësojnë ndryshim”, u shpreh Osmani.

Kryeministri i vendit, Albin Kurti, tha se barazia gjinore nuk ka për qëllim vetëm kuotën gjinore, por është edhe detyrim ligjor.

“Agjenda është ballafaquar me sfida të shumta në zbatimin e legjislacionit. Policia e Kosovës na dëshmon qasjen pro aktive për ta fuqizuar rritjen e grave në siguri. Arritja e barazisë gjinore nuk ka të bëjë vetëm me rritjen e kuotës gjinore por është detyrim ligjor për të arritur sundim të ligjit. Kur gratë e raportojnë dhunën, duhet të gjejnë polici mbështetëse, dhe nuk duhet ta ndiejnë veten vetëm. Përfshirja e grave në institucione ka kthyer ne traditë, por është larg kërkesave që kanë gratë për tu përfshirë në këtë sektorë. Për të angazhuar më shumë gra në këtë sektorë, duhet të përkujdesemi bashkë, që t’i parandalojmë rastet e ngacmimit seksual në punë. Jemi të vetëdijshëm që mungon kujdesi ndaj fëmijëve që i bën të hezitojnë punësimin në institucione”, tha Kurti.

Në anën tjetër ministri i Punëve të Brendshme, Xhelal Sveçla, tha se mbi 15 për qind e të punësuarve në Policinë e Kosovës janë gra.

“Policia vazhdon të jetë shembull për barazi gjinore jo vetëm në Kosovë por edhe në rajon. Funksionimi i shoqatës brenda policisë është një vlerë tjerët në Kosovë. Polici ka të punësuar. Pjesëmarrja e tyre mbi 15 për qind Vajzat dhe gratë janë në Polici që nga gjeneratat e para, ku nga rreshter e deri te grada kolonel. Dokumenti i jep mbështetje edhe agjendës së OKB-së, ku garanton me mbulim shëndetësor, fuqizim të grave dhe një mjedis të qëndrueshëm. Përmes objektivave, policia do të mundësojë përfshirje e grave në këtë sektor, duke mos lënë anash mbështetjen institucionale”, deklaroi Sveçla. /Telegrafi/