Trepça ’89 mposht si mysafirë Lirinë, Llapi triumfon si vendas kundër Drenicës

Trepça ’89 dhe Llapi kanë shënuar fitore në kuadër të xhiros së 30 të Vala Superligës së Kosovës në futboll.

Mitrovicasit triumfuan si mysafirë të skuadrës prizrenase Lirisë me rezultat 2-0, gjersa Llapi para shikuesve të vetë mposhti ekipin e Drenicës me rezultat minimal 1-0.

Qysh në minutën e katërt, “Minatorët” treguan se kishin ardhur në Prizren për tre pikë, kur iu anulua një gol shkaku i pozitës jashtë loje.

Por, gjelbërezinjtë arritën të tundin rrjetën e bardhezinjve në të njëzetën minutë me anë të sulmuesit Oto John.

Golin e dytë dhe të fitores, mysafirët e shënuan pesë minuta para përfundimit të takimit me anë të Arb Manajt.

Në anën tjetër, llapjanët gjatë gjithë ndeshjes dominuan kundër drenicakëve, gjë që rezultoi edhe me fitimin e tre pikëve në fund të takimit.

Në fakt, Kreshnik Lushtaku shënoi në portën e gabuar duke mposhtur portierin e vetë katër minuta pas fillimit të ndeshjes.

Në vazhdim të ndeshjes më nuk pati gola dhe kështu, podujevasit shënuan fitore me rezultat 1-0.

Pas kësaj, Llapi zë pozitën e tretë me 48 pikë ndërsa Trepça ’89 ngritët në vendin e katërt me 47 pikë, po aq sa ka Liria e vendit të pestë. Drenica zbret në vendin e gjashtë me 45 pikë. /Telegrafi/