Tregtia me BE-në, 2.2 miliardë euro në vit

Prodhimet shqiptare po përballen me një konkurrencë të egër ndaj atyre të importit. Bashkimi Evropian mbetet partneri kryesor në shkëmbimet tregtare, ku Italia është në krye të listës.

"Për vitin 2008, shkëmbimet me vendet e BE-se kanë zënë mbi 64.8% të volumit të tregtisë së jashtme të Shqipërisë, ndërsa eksportet e mallrave drejt vendeve të BE-së për vitin 2008, kanë zënë rreth 80 % të totalit të eksporteve, me një rritje prej 11.8% në krahasim me vitin 20007",- thuhet në njoftimin zyrtar të Ministrisë së Integrimit.

Me reduktimin gradual të tarifave doganore, duke nisur nga 1 janari i vitit 2006, shkëmbimet tregtare mes Shqipërisë dhe Bashkimit Evropian janë rritur ndjeshëm. Vetëm gjatë vitit 2008, importet nga BE-ja janë rritur me rreth 19%, krahasuar me një vit më parë dhe arrijnë në rreth 2.2 miliardë euro, ose rreth 61% e totalit të importeve që hyjnë në Shqipëri.

Edhe eksportet kanë njohur një gjallërim, por në vlera shumë më modeste. Kështu, sipas të dhënave të Ministrisë së Integrimit, për 2008-ën janë eksportuar 46 milionë euro produkte bujqësore, nga 23 milionë që ishin një vit më parë, me një rritje prej 50%. Ndërsa vetëm importet nga BE-ja të produkteve bujqësore, gjatë vitit të kaluar pësuan një rritje prej 135%, duke shënuar një vlerë totale prej 342 milionë eurosh.