“Ta shohim tash a guxojnë ata të vijnë te unë”, PDK e LDK i reagojnë Kurtit pas deklaratës për Prokurorinë Speciale

Partitë në opozitë LDK dhe PDK kanë reaguar pasi kryeministri i vendit, Albin Kurti që disa herë nuk i është përgjigjur ftesës së Prokurorisë Speciale për intervistim si dhe ka thënë se “i mirëpret prokurorët në zyrën e tij”.

Deputetja e Lidhjes Demokratike të Kosovës (LDK), Hykmete Bajrami tha se Kurti shfaqi hapur apetitet e tij të frikshme për të kapur sistemin e drejtësisë dhe për të rrënuar rendin kushtetues të vendit.

“Mos harroni, po bëhen katër vite që Kurti ka qenë kryeministër, me shumicë parlamentare në Kuvend, me qeveri pa koalicione dhe pa pasur asnjë pengesë, por sipas tij, drejtësia e ka penguar, prandaj atij nuk i mjafton të jetë kryeministër; ai po kërkon të bëhet mbret”, ka shkruar Bajrami në Facebook.

Ajo po ashtu ka thënë se me deklaratën e fundit Kurti ka sfiduar hapur Prokurorinë Speciale.

Lexo po ashtu Kurti, Prokurorisë Speciale: Unë guxoj t’ju them s’po vij, ta shohim tash a guxojnë ata të vijnë te unë

“Çfarë thotë një deklaratë e tillë për barazinë para ligjit? Çfarë mesazhi është ky për qytetarët e këtij vendi që respektojnë ligjet, rregullat dhe institucionet e drejtësisë?

Sulmet e tij ndaj Gjykatës Kushtetuese, mosnjohja dhe kundërshtimin i vendimeve të saj, janë një tregues tjetër i ambicieve të tij për të ndryshuar rendin kushtetues në vend. Kurti asnjëherë nuk përmend se është vendimi i po kësaj Gjykate që çoi te zgjedhjet e parakohshme dhe e solli atë në pushtet, në vitin 2021.”, ka shkruar Bajrami.

Edhe anëtari i Kryesisë së Partisë Demokratike të Kosoëvs (PDK), Përparim Gruda reagoi duke thënë se sulmet e Kurtit ndaj Prokurorisë së Shtetit janë një tregues i qartë i dështimit të tij të plotë në realizimin e reformave të premtuara.

“Kurti përsëriti mbrëmë premtimet e para katër viteve për reformimin e sistemit të drejtësisë, duke harruar se është në fund të mandatit. Tani ai duhet të fliste për realizimin e tyre, e jo t’i përsëriste ato.

Pse nuk e bëre padinë për gjenocid ndaj Serbisë, siç e ke premtuar në programin e qeverisë? Apo edhe këtu të pengon Prokuroria e Kosovës?

Të jesh kryeministër dhe të sulmosh në këtë mënyrë rendin ligjor dhe organet e drejtësisë të vendit tënd nuk është trimëri, por qyqarllëk”, ka shkruar Gruda.

Në lidhje me deklaratën e Kurtit janë përgjigjur edhe nga Këshilli Prokurorial i Kosovës.

Lexo po ashtu KPK-ja i përgjigjet deklaratave të Kurtit: Të gjithë janë të barabartë para ligjit

Kryesuesi i Këshillit Prokurorial të Kosovës, Ardian Hajradaj ka thënë se Prokuroria Speciale e Kosovës e ka mbështetjen e plotë të KPK-së dhe se “të gjithë janë të barabartë para ligjit”.

Ndryshe, kryeministri i vendit, Albin Kurti që disa herë nuk i është përgjigjur ftesës së Prokurorisë Speciale për intervistim duke ka thënë se “i mirëpret prokurorët në zyrën e tij”.

Ai ka potencuar se nuk ndien asnjë detyrim për t’iu përgjigjur ftesës dhe se prokurorët mund të vijnë në zyrën e tij për ta intervistuar.

Kurti tutje ka theksuar se prokurorët po përpiqen të sulmojnë kabinetin e tij qeveritar dhe ministrat. /Telegrafi/