Etiketimet si “figurë përçarëse”, Albulena Haxhiu u përgjigjet PDK-së dhe AAK-së

Pas dështimit të përsëritur për zgjedhjen e kryetarit të Kuvendit të Kosovës, Albulena Haxhiu, deputete e Lëvizjes Vetëvendosje dhe kandidate për këtë post, ka folur në një intervistë ekskluzive për emisionin “Përballje” në Telegrafi.com, ka deklaruar se se refuzimi i kandidaturës së saj është pasojë e qëndrimeve opozitare.

Ajo sqaroi se sipas Kushtetutës dhe aktgjykimit të Gjykatës Kushtetuese, vetëm partia fituese ka të drejtë të propozojë kandidatin për kryetar të Kuvendit.

“Është në diskrecion të Lëvizjes Vetëvendosje të propozojë kandidatin, jo të partive tjera”, theksoi Haxhiu, duke shtuar se refuzimi i emrit të saj është pasojë e qëndrimeve opozitare.

Duke folur për kritikat se është figurë përçarëse, Haxhiu tha se këto etiketime vijnë për shkak të angazhimeve të saj kundër marrëveshjeve që, sipas saj, kanë dëmtuar interesat e qytetarëve dhe Republikës së Kosovës.

Ajo thotë se ka qenë aktive në politikë që nga viti 2010 dhe se angazhimi i saj në Kuvend dhe si ministre e Drejtësisë ka qenë në funksion të mbrojtjes së interesave shtetërore.

Lexo po ashtu Palët nuk lëvizin nga qëndrimet, Haxhiu: Nuk jam optimiste që situata do të ndryshojë në seancën e nesërme

“Ne kemi kundërshtuar Zajednicën, demarkacionin me Malin e Zi, ligjin për amnistinë dhe Gjykatën Speciale, gjithmonë duke u bazuar në interesin e qytetarëve dhe të Republikës”, theksoi ajo.

Haxhiu falënderoi 56 deputetët që e kanë mbështetur deri tani dhe bëri thirrje për angazhim të të gjitha partive politike në mënyrë që Kuvendi të konstituohet dhe të mundësohet kalimi në fazat e tjera të zgjedhjes së institucioneve të reja.

“Ajo çfarë dua të shtoj te këto propozime në këtë rast PDK-së apo AAK-së, sepse AAK-ja ka përmend emra të përveçëm. Duhet me e kuptu, AAK-ja e ka të drejtën të bëjë propozime veç kur të del partia e parë. Domethënë vetëm kur del partia e parë, e kanë të drejtën ta bëjnë propozimin me emrin e përveçëm të kandidatit për kryetar të Kuvendit”, shtoi ajo.

Ajo gjithashtu paralajmëroi për një problem tjetër të mundshëm edhe pas zgjedhjes së kryetarit të Kuvendit, duke thënë se pa vullnet politik mund të ketë vështirësi edhe në zgjedhjen e nënkryetarëve, çka do të bllokonte sërish konstituimin e plotë të Kuvendit.

“Le të na mundësojnë të vijmë te ajo situatë ku votohet Qeveria. Pse po e bllokojmë Kuvendin? Le të vazhdojmë më tej dhe nëse nuk i kemi numrat për Qeverinë, atëherë të ballafaqohemi në atë fazë”, shtoi Haxhiu./Telegrafi/