Spektakël në Podujevë, Ballkani mposhtë Prishtinën në ndeshjen që zgjati 110 minuta

Ballkani ka fituar duelin prej 110 minutave ndaj Prishtinës të zhvilluar në stadiumin ‘Zahir Pajaziti’ në Podujevë.

Suharekasit kanë triumfuar me rezultat të pastër 0-2 në një ndeshje ku pati gjithçka, gola, kartonë të kuq e penallti.

Pjesa e parë ishte e barbartë me dy skuadrat që luanin me shumë kujdes kryesisht në mesin e fushës.

Përkundër disa rasteve të mira nga dyja ekipet, gola nuk pati dhe 45 minutat e para përfunduan ashtu siç filluan pa gola 0-0.

E në pjesën e dytë ndeshja u bë shumë më interesante, pasi kishte raste të shumta, kartonë e penallti.

Në minutën e 56-të, Lumbard Dellova pengoi brenda zonës Otto John dhe gjyqtari Genc Nuza akordoi penallti, duke ndëshkuar mbrojtësin e mysafirëve me kartonin e dytë të verdhë.

Por nga pika e bardhë, mbrojtësi prishtinas Besnik Krasniqi dështoi, duke mbrojtur goditjen e tij portieri Stivi Frashëri.

Vetëm 14 minuta qëndroi epërsia numërike e Prishtinës në fushë, pasi në minutën e 70-të me karton të kuq u ndëshkua edhe Otto John pas dy të verdhëve.

Në minutën e 90-të, Ermal Krasniqi u pengua në zonë nga Besnik Krasniqi dhe gjyqtari Genc Nuza akordoi penallti për Ballkanin.

Pas tetë minutave rishikim në VAR, gjyqtari prishtinas mori vendimin që penalltia të qëndroi nga ku u tregua i saktë Ermal Krasniqi për 0-1.

Prishtina kërkoi barazimin e rezultatit, por deri në fund nuk ia doli një gjëje të tillë përkundër përpjekjeve të mëdha.

Krejt në fund të ndeshjes, Mevlan Zeka u gjend mirë në zonë për të realizuar për 0-2.

Ballkani me këto tri pikë mbetet në vendin e dytë me 39 pikë, sa ka edhe lideri Gjilani.

Ndërkohë Prishtina zë vendin e gjashtë në tabelë me 24 pikë.

Ndeshjen e radhës Prishtina e zhvillon në udhëtim te Drenica, derisa Ballkani pret Ulpianën. /Telegrafi/