Shqipëri: Buxheti, gati në fillim të tetorit

Duket se Ministria e Financave e Shqipërisë nuk do ta zbatojë planin e Kryeministrit për ta pasur buxhetin në tryezën e tij brenda muajit shtator, madje kreu i qeverisë kishte kërkuar ta kishte gati projektin në fillim të këtij muaji, por vështirësitë e hasura gjatë fazës së negociatave kanë shtyrë për disa javë përfundimin e projektit.

Burime zyrtare nga Ministria e Financave konfirmojnë për “Shqip”, se pritet të nisin shumë shpejt takimet dypalëshe me ministritë e linjës për të rakorduar buxhetet e planifikuara në kuadrin afatmesëm.

Pas kësaj faze është planifikuar një tjetër proces, ai i negociatave, që konsiderohet më i vështiri.

“Parashikojmë që buxhetin ta kemi gati për miratim në qeveri, të paktën brenda javës së dytë të muajit tetorit. Është e pamundur të ecë më shpejt”, tregon një zyrtar i ministrisë.

Sipas planit të Financave, kalimi i buxhetit në tetor nga Këshilli i Ministrave, mundëson një kohë të mjaftueshme, të paktën një muaj e gjysmë, që Parlamenti të debatojë për të gjetur alternativën e duhur të buxhetit.

Ndërkaq, këtë javë dolën në dritë disa të dhëna kontradiktore të buxhetit të shtetit për vitin 2011.

Në fillim ishte planifikuar një shumë e përafërt me 395 miliardë e 200 milionë lekë, e më pas u mësua një tjetër variant me 408 miliardë lekë.

Sipas ministrisë, të dyja vlerat e buxhetit mund të pësojnë sërish ndryshime në varësi të negociatave.

Qeveria planifikon ta ulë deficitin buxhetor në 2011 me 2.8 për qind në raport me Prodhimin e Brendshëm Bruto, nga 3.1 për qind që parashikohet për këtë vit.

Gjithsesi do të pritet fundi i vitit për të mësuar realizimin faktik të të ardhurave, të cilat kanë pësuar një reduktim si efekt i krizës. /Telegrafi/