Shqipëri: Bien të ardhurat nga taksat

Ministria e Financave e Shqipërisë e pranon se kriza ekonomike ka lënë pasoja të rënda financiare te bizneset. Në dokumentin zyrtar të raportimit të të dhënave rreth të ardhurave dhe analizës së bërë pas shifrave faktike, ekspertët e ministrisë pranojnë se efektet e krizës te bizneset ka dhënë ndikim të fortë negativ në bilancin e të ardhurave për buxhetin.

Sipas, shifrave, nga taksa e tatim-fitimit, arritën në rreth 7 miliardë e 500 milionë lekë nga 8 miliardë e 200 milionë lekë të planifikuara, duke qenë në nivelin 91 për qind ndaj parashikimit. Edhe duke i krahasuar me një vit më parë, të ardhurat nga kjo taksë kanë pësuar një ulje prej gati 701 milionë lekë, ose 8.6 për qind.

Tatimi mbi fitimin e kompanive parapaguhet në bazë të fitimeve të realizuara gjatë periudhave të mëparshme të aktivitetit të tyre. Për pasojë, rënia e të ardhurave dëshmon prezencën e krizës ekonomike te bizneset në Shqipëri. Situata parashikohet të vijojë negative për të gjithë vitin 2010 dhe këtë fakt e pranon vetë Ministria e Financave.

“Gjatë vitit 2009, fitimet e kompanive pësuan rënie dhe situata financiare e tyre u vështirësua. Kjo ka ndikuar në uljen e kësteve të parapagimit të tatim fitimit për vitin 2010 dhe do të ndikojë në të ardhurat e mbledhura nga ky zë për gjithë vitin 2010”, thuhet në dokumentin zyrtar të raportimit të të dhënave faktike mbi të ardhurat e 5 mujorit të parë. /Shqip/