Shënohet tetëvjetori i Gjykatës Kushtetuese, vlerësohet puna e saj

Me rastin e shënimit të tetëvjetorit të Gjykatës Kushtetuese të Kosovës, është thënë se vetëm një gjykatë e paanshme mund ta gëzojë besimin e palëve dhe qytetarëve.

Shefi i shtetit, Hashim Thaçi, ka thënë se zbatimi i Kushtetutës është qenësor për shtetin e Kosovës dhe se Gjykata Kushtetuese duhet të vazhdojë të mbrojë rendin kushtetues.

Sipas tij, ky institucion gjatë tetë viteve të punës së saj, ka treguar se është plotësisht e pavarur në kryerjen e përgjegjësive të saja në mbrojtje të kushtetueshmërisë.

“Funksionimi dhe efikasiteti i Gjykatës Kushtetuese duhet të merret si model i funksionimit të gjyqësorit në vendin tonë dhe në nivelet tjera të gjyqësorit. Sot derisa po festojmë tetëvjetorin e themelimit të Gjykatës Kushtetuese dua të ceku edhe dekretimin e djeshëm të 40 gjyqtarëve dhe të 13 prokurorëve nga komunitetet jo shumicë të Kosovës. Kjo ngjarje shënon konsolidimin dhe forcimin e sovranitetit të Kosovës dhe avancimin e implementimit të të gjitha marrëveshjeve të dala nga dialogu i Brukselit”, ka thënë Thaçi.

Ndërsa, kryetari i Kuvendit të Kosovës, Kadri Veseli, ka thënë se Gjykata Kushtetuese ka bërë punë të jashtëzakonshme gjatë tetë viteve të themelimit të saj dhe për pak vite ka arritur që të tjerëve iu janë nevojitur dekada të tëra.

Sipas tij, një meritë të veçantë të veçantë e ka Gjykata jonë Kushtetuese në një demokraci parlamentare dhe liberale siç është Kosova, njësia kushtetuese sipas tij, është vendimtare për stabilitetin institucional dhe politik të vendit.

“Gjykata Kushtetuese e Kosovës ia ka dalë me shumë sukses ta përmbushë këtë rol dhe kjo është arsyeja që ajo sot gëzon besimin e qytetarëve”, ka shtuar  Veseli.

Kryeministri i Kosovës, Ramush Haradinaj, është shprehur se qeveria që ai drejton do të ndihmojë Gjykatën Kushtetuese që të mbrojë normat e saja kushtetuese.

Sipas tij, Qeveria e Kosovës do të jetë në dispozicion që brenda kuadrit  kushtetuese të ndihmojë Gjykatën në rrugëtimin e saj që të mbrojë normat e saja kushtetuese./Telegrafi/