Reagimi emocionues i vëllezërve Klitschko pas sulmit që Rusia i bëri Ukrainës: Është një tragjedi e madhe për gjithë botën, forcat ukrainase po e mbrojnë me heroizëm tokën tonë

Dy legjendat e boksit, vëllezërit Vitali dhe Wladimit Klitschko kanë reaguar për luftën në Ukrainë.

Ish-kampionët e botës në boksin profesionist kanë publikuar një video të përbashkët ku kanë dhënë një mesazh në tri gjuhë të ndryshme, ukrainase, ruse dhe në anglisht.

Dyshja kanë thënë se ushtarët ukrainas po e mbrojnë me heroizëm tokën e tyre, derisa kanë kërkuar edhe mbështetje nga bashkësia ndërkombëtare.

“I ftojmë të gjithë partnerët tanë ndërkombëtarë që ta vëzhgojnë dhe ta shohin këtë tragjedi që po ndodh në Ukrainë dhe këtë luftë pa kuptim dhe pa sens, e cila nuk do të ketë as fitues as humbës”.

“Duam t’ju themi se ne duhet të qëndrojmë të bashkuar kundër këtij agresioni, kundër agresionit rus. Mos e leni të ndodh kjo në Ukrainë, të ndodhë në Evropë, dhe eventualisht edhe në botë. Së bashku jemi më të fortë, mbështeteni Ukrainën”, thonë vëllezërit Klitschko.

“Sot është një tragjedi e madhe – jo vetëm për Ukrainën, por edhe për Evropën dhe botën. Forcat e Armatosura të Ukrainës po mbrojnë me heroizëm tokën tonë”.

“Ne në Kiev sigurojmë funksionimin e infrastrukturës kritike të kryeqytetit. Ne bëjmë gjithçka për ta mbrojtur qytetin tonë. Qëndrueshmëri dhe vendosmëri. Unitet dhe mendje e ftohtë! Vetëm kështu do të mbijetojmë! Lavdi Ukrainës!”, thuhet në postimin e vëllezërve ukrainas.

Kujtojmë që Vitali Klitschko është një politikan ukrainas që aktualisht ka edhe pozitën e bashkiakut në Kiev, derisa Wladimir i është bashkuar forcave rezervë të ushtrisë ukrainase.  /Telegrafi/

View this post on Instagram

A post shared by Віталій Кличко (@vitaliyklitschko)