PTK investon në Shqipëri në operatorin e katërt mobil

Bordi i PTK-së ka miratuar në parim projektin për të bashkëinvestuar në ngritjen e operatorit të katërt në Shqipëri të telefonisë mobile. Lajmi është konfirmuar nga kryetari i bordit të PTK-së, Rexhë Gjonbalaj. Nëse realizohet plani, PTK, është kompania e parë kosovare e cila do të investojë dhjetra miliona euro jashtë kufijëve të Kosovës.

“Ende nuk është përcaktuar shuma se sa do të investohet por bëhet fjalë për një bashkëinvestim me operatorin e katërt të telefonisë mobile që ka marrë licensë në Shqipëri. Ende jemi në fazën fillestare të procesit. Gjatë ditës së djeshme bordi e ka miratuar në parim planin, ndërsa forma dhe detajet e tjera do të dihen më vonë”, tha për telegrafi.com, kryetari i bordit të PTK-së, Rexhë Gjonbalaj.

PTK është kompani lider në shërbimin e ofrimit të telefonisë mobile dhe fikse në Kosovë. Gjatë vitit të kaluar kjo kompani ka pasur më shumë se 170 milion euro qarkullim.

PTK gjithashtu ka më shumë se 300 milion euro para kesh, të cilat prej vitesh qëndrojnë në trezorët e bankave komerciale në Kosovë.

Nëse të gjitha punët shkojnë siq duhet, atëherë Vala do të jetë kompania e parë e cila kryen investime jashtë Kosovës, ndërsa ky investim do të rrisë dhe mëtutje vlerën e sajë në tregun ndërkombëtarë.

Lloagrite se PTK-Vala ka rreth 800 mije abonentë në tregun e Kosovës.

Në Shqipëri operojnë për momentin tre operatorë të telefonisë mobile me çmime dy deri në tre herë më të larta se në Kosovë. /Telegrafi/