Pritet rritja e çmimit të bukës

Shoqata e furrtarëve dhe mullisëve të Prishtinës, e cila përfshin edhe prodhues të bukës nga Fushë Kosova, Obiliqi, Skënderaj, Mitrovica dhe Podujeva, ka paralajmëruar rritje të çmimit të bukës nga 25 në 30 centë, apo rreth 16 për qind.

Shtrenjtimi i këtij artikulli elementar, nuk është aspak i mirëseardhur për konsumatorët, veçmas ata me të ardhura të ulëta. Por, në pamundësi për të ndikuar në çmim, pasi çmimin e përcakton tregu, ata kërkojnë nga prodhuesit, që të zbatojnë edhe kriteret e cilësisë dhe sasisë.

Përfaqësuesi i Shoqatës së Furrtarëve dhe Mullisëve, Shefki Ostërgllava, njëherësh pronar i rrjetit të furrave “Sheki”, tha se vendimi për nivelizim të çmimit të bukës, do të ndikojë në eliminimin e parregullsive në treg, por edhe në standardizim të bukës, qoftë sa i përket cilësisë, sasisë, por edhe çmimit.

Përderisa nuk kanë asnjë marrëveshje të shkruar, shumë prodhues edhe sot vazhdonin me çmimet e vjetra. Por, Rexhë Morina, pronar i furrës “EDI”, thotë se do ta rrisin çmimin, për shkak të obligimeve të mëdha.

Shefi i inspektoratit të tregut në komunën e Prishtinës, Ahmet Frangu, paralajmëroi se prej nesër një ekip do të dalë në terren për të kontrolluar sasinë dhe cilësinë e bukës.

Në bazë të ligjit për mbrojtjen e konsumatorëve, gjobat në rast të mospërmbushjes së cilësisë dhe sasisë së mallit që shitet, sillen prej një mijë deri në 4 mijë euro.

Por, Frangu u shpreh i pakënaqur me punën e gjykatave sa i përket rasteve të shkeljes së të drejtave të konsumatorëve. Ndërkohë kontrollin e furrave do ta bëjnë edhe inspektorët sanitarë, që kërkojnë patjetër që buka të shërbehet me dorëza, por edhe të përdoret ambalazhi, sikurse në të gjitha vendet e botës./rtk.telegrafi/