Prishtina eliminon Dritën me një supergol të Boshnjakut

Prishtina është kualifikuar në çerekfinale të Kupës së Kosovës në futboll, pas fitores prej 1-0 ndaj Dritës në ndeshjen e zhvilluar në stadiumin “Fadil Vokrri” në kryeqytet që u vendos pas vazhdimeve.

Nikoqirët luajtën më mirë në minutat e para duke krijuar raste shënimi, por u mungonte konkretizimi. Mysafirët u konsoliduan kah fundi i pjesës së parë, megjithatë skuadrat shkuan në pushim me rrjetat e paprekura.

Të dyja ekipet tentuan të rrezikonin në fraksionin e dytë të lojës, megjithatë nuk ishin efektive në finalizimin e rasteve.

Deri në fund të kohës së rregullt, asnjëra nga skuadrat nuk ia doli të shënonte, ashtu që ndeshja shkoi në vazhdime.

Në fund të pjesës së parë të vazhdimeve (105’+1), Lorik Boshnjaku pranoi një top jashtë zonës, krijoi hapësirë dhe shënoi një supergol.

Drita nuk arriti t’i ndryshonte gjërat në 15 minutat e pjesës së dytë të vazhdimeve, ashtu që u eliminua, derisa Prishtina vazhdoi në çerekfinale të Kupës së Kosovës në futboll.

Për më shumë, në minutat e fundit, Erjon Vuçaj dhe Vladica Brdarovski u përjashtuan me kartonë të kuq, njëri direkt, tjetri me dy kartonë të verdhë. /Telegrafi/