Presidenca e Francës në BE, Macron paraqet vizionin e Evropës së fortë dhe të pavarur në fjalimin e tij

Presidenti francez Emmanuel Macron i tha Parlamentit Evropian në Strasburg të mërkurën se ai synon të përdorë presidencën franceze të BE-së për të nxitur një Evropë të qëndrueshme, të fortë dhe të pavarur.

Sipas mediave të huaja, përcjell Telegrafi, Macron tha se tri premtimet e mëdha të Bashkimit Evropian – demokracia, përparimi dhe paqja – duhet të ankorohen sërish, duke shtuar se sundimi i ligjit duhet të mbrohet si parim në të gjithë BE-në pikërisht për këtë arsye.

Presidenti francez përmendi ndryshimin e klimës, dixhitalizimin dhe çështjen e sigurisë dhe paqes në Evropë si sfidat më të mëdha të bllokut.

BE-ja duhej të vepronte me largpamësi në vend që të lejonte që e ardhmja e saj të varej nga vendimet e marra nga vendet e tjera, tha ai.

Franca mori presidencën e rradhës gjashtëmujore të BE-së më 1 janar, duke zgjedhur moton “ngritje, forcë dhe partneritet”.

Me kërcënimin e përshkallëzimit të krizës në Ukrainë që po afrohet gjatë proceseve, Macron bëri thirrje për një rend të ri të sigurisë dhe stabilitetit evropian, duke thënë se një propozim duhet të përpunohet nga anëtarët e BE-së, pastaj të ndahet me aleatët e saj të NATO-s përpara se t’i paraqitet Rusisë për negociatat.

Dialogu me Rusinë mbeti thelbësor, theksoi Marcon. Paprekshmëria e kufijve, liria për të zgjedhur aleatët tuaj, heqja dorë nga forca – të gjitha këto ishin parime për të cilat Evropa dhe Rusia ranë dakord shumë vite më parë, tha ai.

“Është në dorën tonë evropianëve të mbrojmë këto parime dhe të drejtën e natyrshme të sovranitetit të shtetit”, përfundoi ai. /Telegrafi/