Për zhvillimin ekonomik, Jahjaga gjendet në Portorozh të Sllovenisë

Presidentja Atifete Jahjaga po merr pjesë në Samitin 100 të liderëve të biznesit në Evropën Juglindore, në Portorozh të Sllovenisë

Jahjaga, e ftuar nga Presidenti i Republikës së Sllovenisë, Borut Pahor, merr pjesë në Samit së bashku me presidentët e vendeve të tjera të rajonit të Ballkanit.

Samiti 100, që organizohet nën përkujdesjen e presidentit Slloven, mbledh një numër të udhëheqësve të biznesit dhe ndërmarrës nga vendet e rajonit të Evropës Juglindore.

Jahjaga dhe presidentët e tjerë pjesëmarrës ishin pjesë e panelit të diskutimeve në kuadër të Samitit “Marrëveshja e re për një Epokë të Re”, ku u diskutua për çështje të ndryshme të bashkëpunimit rajonal dhe ideve e projekteve të përbashkëta në fushën e zhvillimit ekonomik.

“Na duhet krijimi i një Marrëveshjeje të Re (New Deal), e cila do të shtojë atraktivitetin tonë edhe karshi investitorëve të huaj. Një zhvillim i mirë për të gjitha shtetet e rajonit është edhe Konferenca e Berlinit, ku u vulos përkushtimi që perspektiva e vendeve të rajonit të Ballkanit Perëndimor është në BE”, ka thënë Jahjaga.