PDK e LDK kërkojnë nga qeveria t’i plotësojë kërkesat e policisë

Dy partitë opozitare, Partia Demokratike e Kosovës dhe Lidhja Demokratike e Kosovës kanë kërkuar nga qeveria të plotësojë kërkesat e policisë, për sigurimet shëndetësore, shtesat, pagesën e rrezikshmërisë dhe pensionimin e parakohshëm.

Në Kuvendin e Kosovës në seancën e re plenare, pas përfundimit të debatit për Raportin e Progresit, shefi i Grupit Parlamentar të PDK-së, Abelard Tahiri, përgëzoi aksionin e sotëm të policisë për arrestimin e katër personave dhe neutralizimin e një të dyshuarit për grabitjen e armatosur në një argjendari në Suharekë.

Ai në deklarimet jashtë rendit të ditës nënvizoi nevojën që ekzekutivi në kuadër të projekt-buxhetit për 2024 të përfshijë kërkesat e policisë.

“Ky aksion i policisë së Republikës së Kosovës tregon një gjë që i duhet përkrahje nga Qeveria dhe Kuvendi. Sot, pamë një profesionalizëm të lartë të njësive të specializuara të policisë, andaj është mirë që kërkesat e tyre që i kanë shtruar, si për sigurimet shëndetësore, si për shtesat t’i përfshijnë në buxhetin e Kosovës”, tha ai.

Edhe shefi i Grupit Parlamentar të LDK-së, Arben Gashi shprehu mbështetjen ndaj policisë, derisa tha se vendi po kalon në një situatë të vështirë në aspektin e sigurisë.

“Gjatë këtyre ditëve kemi pas një situatë të vështirë në aspektin e sigurisë, ku si rrallë herë në Kosovë kemi pa një grabitje të armatosur të stilit banditesk dhe një paraqitje të forcës së grupeve kriminale. Kjo shfaqje e dhunës është një moment i alarmit dhe shqetësimit për të gjithë ne si institucione, pa marrë parasysh në cilën parit jemi. Po ashtu, në njëjtën kohë përgëzoj Policinë e Kosovës për aksionin e suksesshëm sot”, theksoi Gashi.

Megjithëse pa praninë e shumicës së deputetëve të mazhorancës, kryeparlamentari Glauk Konjufca vazhdoi seancën duke shqyrtuar pikat e tjera të rendit të ditës, ku deputetët e PDK-së dhe LDK-së kundërshtuan Projektligjin për Fondin Sovran, derisa paralajmëruan se do ta dërgojnë në Gjykatën Kushtetuese.