Paqe në Klinë, Dukagjini dhe Gjilani ndajnë pikët

Ndeshje fantastike është zhvilluar në Klinë mes Dukagjinit dhe Gjilanit, por që në fund nuk pati fitues pasi përfundoi me rezultat të barabartë.

Ishte një pjesë e parë pa shumë raste të mira shënimi, derisa në minutën e 33-të erdhi edhe goli i parë.

Ahmed Januzi në rastin e parë në ndeshje arriti të realizoj lehtësisht në portën e mysafirëve për 1-0.

Gjilani krejt çfarë bëri në pjesën e parë ishte një goditje nga Donjet Shkodra, por që përfundoi mbi portë.

Me epërsinë minimale të vendasve 1-0 përfunduan 45 minutat e para të kësaj sfide.

Edhe pjesa e dytë nisi më mirë për vendasit, të cilëve iu mohua goli nga Enea Koliqi që intervenoi në minutën e 55-të.

Rast të mirë pati edhe Ahmed Januzi, por që goditja e tij shkoi ngjitur me shtyllën.

Bujar Shabani i vendasve krijoi një tjetër mundësi, por edhe që goditja e tij shkoi jashtë potës.

Gjilani në rastin e parë serioz arriti të barazoj rezultatin, pasi kapiteni Gerhard Progni shënoi me kokë në minutën e 86-të për 1-1.

Krejt në fund të ndeshjes, Gjilani fitoi një penallti.

Gerhard Progni mori përsipër ekzekutimin e saj, por portieri vendas Kenan Haxhihamza priti penalltinë duke i siguruar një pikë Dukagjinit.

Kësisoj në fund dy skuadrat u desh të kënaqen me nga një pikë nga kjo sfidë.

Me këtë barazim, Gjilani mbetet në vendin e tretë në tabelë me 21 pikë, derisa Dukagjini është në të tetin me 11 pikë. /Telegrafi/