Pa përfaqësues politik

Kosova do të përfaqësohet këtë javë në CEFTA në nivel drejtorish. Atje nuk do të jetë asnjë përfaqësues politik, ani pse pritet të merret vendim se kush do ta kryesojë këtë marrëveshje në mot.

Sipas gazetës Express, Kosova do të marrë pjesë pa përfaqësues politik, në takimet e kësaj jave ku pritet të vendoset për modalitetet e kryesimit të Marrëveshjes për Tregti të Lirë (CEFTA). Pas dorëheqjes se ministrit Lutfi Zharku nga Ministria e Tregtisë dhe Industrisë, të gjitha punët lidhur me këtë marrëveshje tani kanë kaluar në nivel drejtorish.

Kjo, edhe me gjithë faktin se këshilltari politik, i caktuar në Ministrinë e Tregtisë dhe Industrisë, nuk është në gjendje të marrë vendime.

Ndërkohë, kjo pritet të jetë java më e nxehtë për shtetin më të ri, pasi pritet të vendoset rreth kryesimit në këtë marrëveshje. Sipas radhës, kjo e drejtë i takon Kosovës.
“Kosova në këtë moment nuk ka autoritet për të marrë vendime politike”, ka thënë një burim i afërt me këtë proces për gazetën Express.

I njëjti ka saktësuar se kjo po ndodh pikërisht në kohën kur Kosova duhet të dëshmojë se është e gatshme t’i marrë përgjegjësitë e veta mbi supe për të udhëhequr me CEFTA-n.

Sipas tij, tanimë po rrezikohet edhe skenari i mëparshëm, sipas të cilit shtetet anëtare, duke përfshirë këtu edhe Serbinë, u pajtuan që për vitin 2011 të kryesojë Kosova.

“Është shumë më mirë të kalohet kryesimi te një autoritet tjetër”, thotë ai. /Telegrafi/