Osmani: Kosova e gatshme për dialog, por jo për një dialog të tipit Thaçi

Kryetarja e Kuvendit të Kosovës, Vjosa Osmani ka thënë sot se Kosova është gjithnjë e gatshme për dialog, por jo për një dialog të tipit Thaçi, që në vetvete përfshin negociata sekrete me presidentin e Serbisë, Aleksander Vuçiq që ka rezultuar me hapjen e temave dhe aventurave të rrezikshme, si për vendin tonë ashtu edhe për paqen dhe stabilitetin në rajon.

Osmani pas mbledhjes së Kryesisë së Kuvendit tha se Thaçi në vend se të dalë dhe të tentojë të merr kompetencat e qeverisë, do të duhej të deklarohej njëherë e mirë për një çështje substanciale,  se a garanton se kurrë më nuk do të vë në tavolinë asnjë milimetër të territorit të Kosovës, raporton Telegrafi.

“…. Po ashtu të sqarohet se a ka hequr dorë nga ideja e tij dhe e Vuçiqit, ideja e rrezikshme për korrigjim të kufijve sepse herën e fundit që kemi kontrolluar në ueb faqen zyrtare të presidentit akoma gjendet Opedi i tij, opinioni me emrin dhe mbiemrin e tij që thekson se ‘Presidenti e kryeministrat do të ndryshojnë po korrigjimi i kufijve do të ndodhë’. Po supozoj se meqenëse nuk e kanë zëvendësuar këtë Oped, ai akoma qëndron prapa idesë së ndryshimit të kufijve”, tha ajo.

Osmani më tej shtoi se ide të tilla për korrigjimin e kufijve jo vetëm e ndajnë Kosovën dhe e gjymtojnë territorin, por në esencë janë në kundërshtim me projektin e popullit për shtet të pavarur dhe sovran dhe për një dialog të tillë Kosova nuk është e gatshme.

Duke folur rreth të ardhmes së saj në politikë, ajo tha se “të ardhmen time politike e kanë përcaktuar dhe do ta përcaktojnë qytetarët e Kosovës”.

Se a do të jetë pjesë e Ekipit negocitor, Osmani tha se me vendimin e Kushtetueses sqarohet se Kosovën e përfaqëson Qeveria, ndërsa si Kuvend dhe si kryetare e legjislativit do të sigurohen që të bëjnë mbikëqyrje të fortë që nuk e kanë parë më herët sa i përket çështjes së dialogut.

Ajo Kuvendi ka qenë i qartë me rezolutën e marsit, ku Kosovën e përfaqëson Qeveria e saj, ndërsa vijat e kuqe janë si vijon: nuk preket integriteti i vendit, sovraniteti dhe rregullim i brendshëm kushtetues. /Telegrafi/