Një burrë gjendet i varur në një lis në fshatin Zhur të Prizrenit

Një person është gjetur i vdekur malin Polevica të fshatit Zhur.

Siç bën të ditur policia, një qytetar kishte hasur në trupin e pajetë, i cili ishte i varur me litar tek një lis.

Zëdhënësi i Policisë në rajonin e Prizrenit, toger Shaqir Bytyqi ka thënë se në vendin e raportuar është gjetur trupi i dekompozuar.

“Një dëshmitar sot rreth orës 12:00 ka raportuar në nënstacionin Zhur se në malin që njihet si Polevica mbi fshatin Zhur në afërsi të magjistrales Zhur-Dragash, ka hasur në një person të varur me litar për një lis. Në vendin e ngjarjes kanë shkuar patrullat policore te stacionit policor të Prizren së bashku me hetuesen kujdestare dhe aty shihet personi i varur, duket mashkull, i dekompozuar”, ka thënë Bytyqi.

Me urdhër të prokurorit trupi i pajetë dërgohet në Institutin Mjeko Ligjor.

Ndryshe, më 19 shtator Policia e Kosovës kishte kërkuar ndihmën e qytetarëve për informacione që do të ndihmonin në gjetjen e B.G., 49-vjeç, nga fshati Zhur.

Për herë të fundit ai ishte parë më 10 shtator 2022./Telegrafi/