Memli Krasniqi: Janë pjekur kushtet që Kuvendi të shpallë pushimin veror

Shefi i Grupit Parlamentar të Partisë Demokratike të Kosovës (PDK), Memli Krasniqi ka thënë se Grupi Parlamentar i LDK-së, po tregojnë fytyrën e tyre pasi nuk e votuan projektligjin për Ratifikimin e Marrëveshjes Financiare për IPA 2017, ndërmjet Republikës së Kosovës dhe Bashkimit Evropian.

Ky reagim i Krasniqit, erdhi pasi ky projektligj nuk kaloi, kjo pasi disa deputetë të LDK-së nuk e votuan atë edhe pse Armend Zemaj pak më herët tha se do ta votojnë.

“Grupi Parlamentar i LDK-së, po duan të na tregojnë që janë shumë të rëndësishëm. Që marrëveshjet ndërkombëtare s’munden të kalojnë pa ta. Ata po e tregojnë fytyrën e tyre. Pak minuta më herët thanë që e votojnë e tash jo”, ka thënë Krasniqi.

Ai po ashtu tha se janë pjekur kushtet që Kuvendi të shpallë pushimin veror, dhe se këto projektligje të votohen në muajin shtator.

“Këtu janë pjek kushtet me shpall pushimin veror. Këtu është shpallë koha që me mbledhë Kryesinë e të shkojmë në pushime verore. LDK po bojkoton. Nuk e meriton qytetari i Kosovës këtë nivel që po shprehen me inate politike. Kjo nuk është dramë. Pesë minuta më herët thatë po e tash jo. Sot në këtë situatë duhet të marrim disa vendime që e çlirojnë këtë situatë që e kemi pas më herët”, tha ndër të tjera Krasniqi.

Ndryshe, kryetari i Kuvendit të Kosovës, Kadri Veseli, edhe një herë ka kërkuar pushim prej 15 minutash.

Këtë gjë Veseli e ka kërkuar pasi që nuk u votua projektligji për Ratifikimin e Marrëveshjes Financiare për IPA 2017, ndërmjet Republikës së Kosovës dhe Bashkimit Evropian. /Telegrafi/