Kuvendi të hënën e ardhshme debaton për mandatin qeverisës të Kurtit, caktohen edhe dy seanca tjera

Kuvendi i Kosovës pritet të mbajë tri seanca plenare, duke përfshirë një për raportimin e mandatit katërvjeçar të Qeverisë së Kosovës.

Kështu bëri të ditur pas mbledhjes së Kryesisë në një konferencë për media shefi i Grupit parlamentar të Aleancës për Ardhmërinë e Kosovës (AAK), Besnik Tahiri, i cili tha se seanca për këtë raportim do të mbahet më 2 dhjetor.

Përkrahje për këtë nismë ka dhënë edhe shefi i Grupit Parlamentar të Lidhjes Demokratike të Kosovës (LDK), Arben Gashi, i cili theksoi se seanca më e rëndësishme do të jetë ajo e 2 dhjetorit, ku do të diskutohet qeverisja e kryeministrit Albin Kurti.

Gashi shtoi se kjo nismë është mbështetur nga LDK-ja dhe se fundi i kësaj legjislature do të përmbyllet me mbajtjen e zgjedhjeve të reja.

Ndërkohë, shefja e Grupit Parlamentar të Lëvizjes Vetëvendosje (LVV), Mimoza Kusari-Lila, u shpreh se kërkesa e opozitës për një seancë më 2 dhjetor është një kërkesë e përsëritur që daton që nga marsi i këtij viti.

Ajo bëri të ditur gjithashtu se do të mbahen dy seanca të tjera më 5 dhjetor, një në orën 10:00 dhe tjetra në orën 14:00.

“Tri seanca, e para një kërkesë e opozitës gati e vjetruar, e cila është bërë në muajin mars të këtij viti. Më 2 dhjetor do të mbahet seanca për mandatin e plotë të qeverisjes Kurti. Kurse me 5 dhjetor do të ketë dy seanca njëra në orën 10:00 dhe tjetra në orën 14:00”, ka thënë Kusari-Lila. /Telegrafi/