Kurti pret në takim një delegacioni nga BE-ja: E rëndësishme integrimi i Ballkanit Perëndimor në familjen evropiane

Kryetari i Lëvizjes Vetëvendosje, Albin Kurti së bashku me deputetët Glauk Konjufca dhe Fitore Pacolli kanë pritur në takim një delegacion nga BE-ja, të kryesuar nga kryetari i grupit të EPP-së në Parlamentin Evropian, Manfred Weber, i cili ishte i shoqëruar nga nënkryetari i tij dhe deputeti i PE-së,  Andrey Kovatchev, asistentja e tij, Nina Tavcar, shefja e misionit të BE-së në Kosovë, znj. Natalia Apostolova dhe Zëvendës Shefi i kësaj zyre, Riccardo Serri.

Në njoftimin e bërë nga LVV thuhet se Weber e ka uruar kryetarin Kurtin për fitoren e zgjedhjeve të fundit, transmeton Telegrafi.

“Ai u interesua për rezultatin e bisedimeve me Lidhjen Demokratike, dhe theksoi se rajoni i Ballkanit Perëndimor, ndryshe nga zhvillimet e fundit ku disa shtete shprehën qëndrime të caktuara për hapjen e negociatave është rajon me prioritet të lartë për BE-në”, thuhet në njoftimin e LVV-së.

Tutje në njoftim thuhet se Kurti u pajtua me Weber sa i përket integrimit të rajonit në BE, duke përsëritur qëndrimin e Lëvizjes Vetëvendosje për nevojën e integrimit të të gjitha shteteve të Ballkanit Perëndimor në të njëjtën kohë dhe sa më parë të jetë e mundur.

Gjithashtu, LVV bën të ditur se Kurti e ka njoftuar Weber edhe me prioritetet e qeverisë së re, ku rol qendror ka luftimi i krimit të organizuar dhe korrupsionit të lartë dhe krijimi i vendeve te reja të punës.

“Me mbështetjen e biznesit të vogël dhe të mesëm dhe me investime nga jashtë e sidomos nga diaspora, me sistemin dual të arsimit që e zvogëlon hendekun e shkathtësive, edhe do ta përparojmë Kosovën përbrenda, edhe do të avansojmë drejt BE-së”, ka thënë Kurti gjatë takimit.

Lëvizja Vetëvendosje bën të ditur se në fund të takimit, palët u dakorduan ta vazhdojnë komunikimin dhe bashkëpunimin në të ardhmen./Telegrafi/