Kreu i Wagnerit, Prigozhin: Ka nisur kundërofensiva e Ukrainës

Yevgeny Prigozhin, themeluesi i grupit mercenar rus, Wagner, beson se kundërofensiva e forcave ukrainase tashmë ka filluar pasi ka vënë re aktivitete të shtuara në vijën e frontit.

Në një deklaratë të publikuar në Telegram, Prigozhin pret që në ditët në vijim ukrainasit të bëjnë zyrtare kundërofensivën, raporton reuters.

Ministri ukrainas i Mbrojtjes, Oleksy Reznikov konfirmoi javën e kaluar se ata janë duke përfunduar përgatitjet për kundër-ofensivën e shumëpritur pranverore.

Lexo po ashtu Ukraina mohon pretendimet e Kremlinit: Nuk jemi përpjekur ta vrasim Putinin

Për muaj të tërë, Kievi është duke u përgatitur për kundërsulmin që synon dëbimin e forcave ruse nga territori i pushtuar i Ukrainës në lindje dhe jug.

Aleati i Vladimir Putinit, i cili sulmon rregullisht udhëheqjen ushtarake ruse për mungesë municioni, paralajmëroi më parë se kundërofensiva ukrainase mund të ketë pasoja katastrofike për Rusinë.

“Kundërofensiva mund të kthehet në një tragjedi për vendin tonë… Çdo ditë, ne vendosim mijëra trupa në arkivole dhe i dërgojmë në shtëpi. Humbjet janë pesë herë më të larta se sa duhet, sepse ne nuk kemi municione të mjaftueshme”, tha kreu i Wagner në një fjalim të fundit. /Telegrafi/