Kosova pranon ndihmë direkte 30 milionë euro

Ministri i Ekonomisë dhe Financave, Ahmet Shala dhe përfaqësuesi i Zyrës Ndërlidhëse të Komisionit Evropian, Kjartan Björnsso njoftuan të mërkurën se Republika e Kosovës tashmë ka pranuar pjesën e parë të ndihmës direkte buxhetore nga Komisioni Evropian, në vlerë prej 30 milionë euro.

Ministri i Ekonomisë dhe Financave, Ahmet Shala tha se kjo mbështetje jo vetëm që e pasuron buxhetin e Republikës së Kosovës duke mundësuar zhvillimin e projekteve të shumta publike, por edhe kurorëzon punën e arritur në zhvillimin e reformave mase të nevojshme të menaxhimit publik.

“Të gjitha këto veprime përfundimisht kanë çuar në plotësimin e kushteve të parashtruara nga Komisioni Evropian për fillimin e dhënies së mbështetjes financiare në vlerë prej 150 milion euro, të premtuar në Konferencën e Donatorëve”, u shpreh Shala.

Ai pohoi se është edhe më inkurajues fakti se kjo mbështetje vjen pas disbursimit të transhit të parë të përkrahjes nga FMN-ja, duke ngritur mbështetjen e pranuar në periudhën qershor-shtator 2010 në 52 milion euro.

Kjo shumë pritet të dyfishohet nga fundi i këtij viti, pas takimeve të ardhshme me FMN-në dhe Komisionin Evropian në tetor.

Ndërsa, përfaqësuesi i Zyrës Ndërlidhëse të Komisionit Evropian, Kjartan Björnsson, tha “Me datën 2 shtator 2010 Komisioni Evropian ka bërë transferimin e shumës prej 30 milion euro për Kosovën. Kjo shumë është pjesa e parë e grantit prej 50 milionëve e premtuar nga Unioni Evropian si mbështetje makro financiare e cila është aprovuar nga UE-ja. Kjo është një mbështetje direkte buxhetore dhe këto mjete si të tilla janë transferuar në llogarinë e qeverisë tek Banka Qendrore e Kosovës”, u shpreh Bjornsson.

Ai gjithashtu tha se kjo asistencë vjen pasi që Kosova ka përmbushur të gjitha kriteret e përcaktuar për këtë disbursim.

Një nga kushtet themelore të Komisionit Evropian për dhënien e mbështetjes financiare në formë të përkrahjes direkte buxhetore ka qenë përpilimi i dokumenteve planifikuese tre-vjeçare dhe i një pakoje të besueshme fiskale. /Telegrafi/