Këto janë ‘goditjet e radhës’ nga administrata e Biden në sanksionet e fundit ndaj Rusisë

Administrata amerikane e udhëhequr nga Joe Biden ka ndërmarrë veprime të mëtejshme të enjten për të sanksionuar kompanitë dhe furnizuesit që kanë ndihmuar në nxitjen e pushtimit të paprovokuar të Ukrainës nga Rusia.

Në këtë drejtim, janë synuar importuesit, furnitorët dhe kompanitë e tjera që ndihmojnë Rusinë t’i shmanget sanksioneve perëndimore dhe duke ndjekur prodhuesit që mbështesin industrinë ruse të energjisë, metaleve dhe minierave.

“Veprimet e sotme përfaqësojnë një hap tjetër në përpjekjet tona për të kufizuar aftësitë ushtarake të Rusisë, qasjen e saj në furnizimet e fushëbetejës dhe fundin e saj ekonomik”, ka thënë në një deklaratë me shkrim Zëvendës Sekretari i Thesarit, Wally Adeyemo, përcjell Telegrafi.

Veprimet e së enjtes përfshijnë sanksione si nga Thesari i SHBA-së ashtu edhe nga Departamenti i Shtetit që synojnë:

Ndalimi i qasjes së Rusisë në produkte që mbështesin përpjekjet e saj ushtarake dhe luftarake;

Ulja e të ardhurave të Rusisë nga sektori i metaleve dhe minierave;

Minimi i kapaciteteve të saj energjetike në të ardhmen;

Zvogëlimi i qasjes së Rusisë në sistemin financiar ndërkombëtar;

Mohimi i qasjes së Rusisë nga teknologjia e prodhuar nga G7 e nevojshme për sektorët e saj të teknologjisë, hapësirës ajrore dhe mbrojtjes.

Siç vë në pah CNN, përcjell Telegrafi, Sekretari amerikan i Shtetit, Antony Blinken tha në një deklaratë me shkrim se departamenti i tij dhe Thesari i SHBA-së po vendosin sanksione ndaj afro 120 individëve dhe subjekteve “për të mbajtur më tej Rusinë përgjegjëse për pushtimin e saj të paligjshëm të Ukrainës dhe për të degraduar aftësinë e saj për të mbështetur përpjekjet e saj të luftës”.

“Këto sanksione do të kufizojnë Rusinë nga qasja në materiale kritike, do të pengojnë prodhimin e saj të ardhshëm të energjisë dhe aftësitë e eksportit, do të kufizojnë përdorimin e sistemit financiar ndërkombëtar dhe do të godasin ata që janë bashkëpunëtorë në shmangien e sanksioneve”, shtoi Blinken.

Në mënyrë të veçantë, thuhet se Thesari sanksionoi të paktën 66 subjekte në një sërë sektorësh dhe juridiksionesh, si dhe dy individë.

Kompanitë përfshijnë banka, furnitorë, importues dhe prodhues.

Ndërsa shumica e subjekteve të sanksionuara sot janë me bazë në Rusi, ka disa kompani me bazë në Kirgistan, si dhe një kompani serbe dhe një kompani me bazë në Emiratet e Bashkuara Arabe. /Telegrafi/