Ikja e të rinjve godet edhe klubin e njohur kosovar të hendbollit, Besa do të mbetet pa portierin më të mirë

Ikja e të rinjve në kërkim të një jete më të mirë ka goditur edhe klubin më të mirë kosovar në hendbollin e pasluftës KH Besa.

Nga “Karagaçi” janë larguar dy lojtarë, në qershor do të largohet edhe portieri më i mirë në Kosovë si dhe të tjerë.

Trajneri i klubit më të suksesshëm kosovar sa i përket hendbollit, Arben Muçolli, këtë dukuri e vlerëson si alarmante.

“Është një fatkeqësi shumë e madhe për rininë tonë. Momentalisht të gjithë janë duke shikuar në drejtim të Evropës për kushte më të mira, edhe pse ekipi i hendbollit KH Besa ndër ekipet e vetme në Kosovë që plotëson kushtet, por të rinjtë tanë po lypin kushte edhe më të mira”, deklaroi për RTV Dukagjinin, Arben Muçolli.

Përkundër këtyre kushteve të mira financiare, KH Besën i janë larguar dy lojtarë ndërsa tani pritet të largohet edhe i treti.

“Deri më tani dy lojtarë tashmë kanë ikur, ndërsa tani pritet që edhe Haris Berisha të largohet që është ndër shtyllat kryesore të klubit”, shprehet më tej Arben Muçolli.

Haris Berisha që është edhe anëtarë i përfaqësueses së Kosovës, tregon arsyet pse ka marrë këtë vendim të vështirë.

“Kam marrë këtë vendim për të pasur një jetë më të mirë. Po shpresoj se do të jetë ashtu siç po mendoj unë…Klubi i hendbollit KH Besa është ndër ekipet më të mëdha dhe ka ofruar kushte shumë të mira që asnjë ekip tjetër nuk i ka. Por arsyet e mija janë personale pse po largohem”, deklaroi më tej Haris Berisha./Telegrafi/