Greqia përmes gazsjellësit të ri furnizon me gaz Bullgarinë, Evropa po pavarësohet nga energjia ruse

Një tjetër gazsjellës i ri ka nisur funksionimin tregtar sot për të transportuar gaz natyror nga Greqia në Bullgari.

Më herët mediat raportuan për gazin që rrjedh në Poloni përmes një tubacioni të ri nga Norvegjia përmes Danimarkës, ndërsa Evropa vazhdon të largohet nga varësia nga burimet ruse të energjisë.

Përçuesi 185 kilometra shkon nga qyteti verilindor grek i Komotinit, ku lidhet me Gazsjellësin Trans-Adriatik, deri në Stara Zagora në Bullgarinë qendrore.

Kapaciteti fillestar është planifikuar të jetë tre miliardë metra kub në vit, me mundësinë e pesë miliardë metra kub në të ardhmen, raporton skynews.

Ndërtimi i tubacionit filloi përpara pushtimit rus të Ukrainës, por hapa të ndryshëm në këtë proces u vonuan që nga përfundimi i tij në korrik.

Në muajin prill, Bullgaria ishte një nga vendet që humbi furnizimin e saj nga Rusia pasi refuzoi kërkesën e Moskës për të paguar në rubla.

Gjithashtu, të premten, operatorët e rrjetit të gazit të Bullgarisë, Rumanisë, Hungarisë dhe Sllovakisë propozuan dërgimin e furnizimeve shtesë të gazit natyror të premtuara nga Azerbajxhani në Evropë.

Në muajin korrik, Komisioni Evropian nënshkroi një memorandum mirëkuptimi me Azerbajxhanin për të dyfishuar importet e gazit natyror azerbajxhanas në të paktën 20 miliardë metra kub në vit deri në vitin 2027. /Telegrafi/