Gjendje kaotike në Itali për shkak të coronavirusit, kolona të gjata para marketeve – raftet tashmë janë zbrazur nëpër shumë qytete

Në disa vende të vogla në rajonin italian Lomardia dhe Veneto, ku jetojmë rreth 50 mijë banorë, prej të dielës ka hyrë në fuqi ligji i karantinës.

Si pasojë e këtij vendimi janë mbyllur marketet, restorantet, baret si dhe janë shtyrë festimet e karnavaleve, janë mbyllur edhe çerdhet e janë shtyrë aktivitetet sportive si dhe të gjitha tubimet e parapara. Madje as transporti publik nuk po funksionon, transmeton Telegrafi.

Nëpër barnatore po vërehet mungesa e madhe e maskave mbrojtëse. Një punonjëse e një barnatore ka deklaruar për Corriere della Sera se nuk ka më maska mbrojtëse as për nevojat e saj.

Banorët e qytetit të vogël Kazalpusterlengo në Lombardi, qytetarët kanë pritur me orë të tëra para markeve për të blerë artikuj të ndryshëm ushqimor, por raftet ishin të zbrazëta.

Në Lombardi, Venet, Emili-Romanji dhe Piemont, janë mbyllur shkollat dhe fakultetet deri më 1 mars. Aty janë duke u mbyllur edhe klubet e natës, baret dhe kafiteritë e ndryshme.

E nga Italia po shfaqen fotografi të rafteve të zbrazëta nëpër markete, ku konsumatorët e dëshpëruar me këtë lajm mbanin maska mbrojtëse.

“Nga qytetet e izoluara nuk do të mund të largohet askush e madje as të hyjë, pasi hyrjet e daljet do të ruhen nga policia e nëse është nevoja edhe nga ushtria”, ka deklaruar kryeministri italian Guisepe Konte, i cili pranoi se këto masa janë marrë nga qeveria.

“Ata që thyejnë apo shkelin rregullat, do të ballafaqohen me ligjin”, ka shtuar kryeministri italian.

Kujtojmë që në Itali gjatë javës së kaluar janë regjistruar rastet e para të personave të prekur me coronavirus, kurse deri më tani kanë humbur jetën 5 persona dhe qindra tjerë janë infektuar. /Telegrafi/