Ferati: Kemi humbur festivalin në Kanada për shkak të vizave

Mirsad Ferati ka thënë se qytetarët e Kosovës janë shumë më ‘të gdhendur’ se qytetarët e shumicës së vendeve ballkanike.

Gjatë pjesëmarrjes në emisionin “Debat Plus” me Ermal Pandurin në RTV Dukagjini, ai ka thënë se është e dhimbshme kur artistët nuk munden të marrin pjesë në festivale ndërkombëtare për shkak të regjimit të vizave që kanë vendet me Kosovën.

Aktori ka treguar një rast kur për shkak të refuzimit të vizave, një grup aktorësh kanë humbur shansin të marrin pjesë në një festival në Kanada.

“Përgjigja që kemi marrë nga ambasada kanadeze është e turpshme që të bën të ulësh në dy gjunjë dhe të vajtosh ditë e natë pse jemi shqiptarë të Kosovës”, tha ai.

Ferati ka treguar më tej arsyen që e kishte dhënë Ambasada kanadeze për refuzimin e vizave.

“Ata na thënë se të ardhurat që keni në shtetin tuaj nuk janë të mjaftueshme për një njeri normal dhe kjo është një arsye mjaft e fortë pse ju do të kërkoni të qëndroni përgjithmonë në Kanada”.

“…Të hyrat që ju i keni nuk janë të vazhdueshme dhe as të rregullta. Pra, ne përballemi me probleme të mëdha me disa përjashtime”, ka treguar ndër të tjera aktori. /Telegrafi/