Bordi i BQK-së suspendon Guvernatorin Rexhepi

Bordi i Bankës Qendrore të Kosovës i është përgjigjur pozitivisht kërkesës që Hashim Rexhepi të suspendohet nga pozita e guvernatorit. Ky vendim i bordit sipas Kohës Ditore është marrë në një mbledhje të jashtëzakonshme për ta suspenduar Rexhepin pa pagesë.

Në njoftimi të cilin iu është dërguar na ana kryetarit të Bordit Hashim Rexhepit, thuhet. “Bazuar në shkresën e juaj të datës 10 shtator 2010 sipas së cilës keni kërkuar nga Bordi i Bankës Qendrore të marrë vendimin mbi suspendimin e juaj nga posti i guvernatorit të BQK-së deri në përfundimin e hetimeve penale ju njoftojmë se Bordi, në mbledhjen e jashtëzakonshme të mbajtur më 16 shtator 2010 pas shqyrtimit të kësaj kërkesë konfirmoi vendimin e 26 korrikut”.

Në vendimin e asaj date Bordi kishte kërkuar nga Kuvendi i Kosovës që ta shkarkonte nga detyra guvernatorin Rexhepi, i cili prej 23 korrikut të këtij viti ndodhet në paraburgim nën dyshimin se ka kryer tetë vepra penale, por Kuvendi nuk e kishte qitur në rend të ditës asnjëherë.

Rexhepi dyshohet së në bashkëveprim me zyrtaren e lartë për mbikëqyrje financiare në BQK, Shkëndije Himaj, drejtorin e Departamentit të sigurimeve të detyruara në Shoqatën e Kompanive të Sigurimeve të Kosovës, Ismet Jashanicën dhe ish-zyrtarin e BQK-së Ibish Mazrekun, ka kryer vepër penale të keqpërdorimit të detyrës zyrtare, ushtrim të ndikimit, pastrim parash, shmangie nga tatimi, marrje ryshfeti në shumë raste dhe abuzim i pozitës zyrtare. /Telegrafi/