Bilanci i fundit: Nëntë të vdekur dhe 40 të plagosur

Nëntë të vdekur dhe 40 të plagosur është bilanci më i fundit i tragjedisë që ndodhi të hënën në mbrëmje pranë Ballshit. Disa prej të plagosurve janë në gjendje shumë të rëndë.

Kryeministri Sali Berisha anuloi të gjitha festimet që priteshin sot për liberalizimin e vizave duke shpallur të martën ditë zie.

Aksidenti ndodhi rreth orës 20.00’, të së hënës, në rrugën nacionale Fier-Tepelenë, në fshatin Ziaj, të Komunës Fratar kur autobusi i linjës Tiranë –Athinë, me targë INB 9900, me drejtues mjeti shtetasin grek Tomas Tsogas, si pasojë e humbjes së kontrollit mbi mjetin, ka rënë në një distancë rreth 100 metra.

Për menaxhimin e këtij aksidenti të rëndë dhe dhënien e ndihmës personave të dëmtuar, menjëherë janë angazhuar strukturat e Drejtorive të Policisë së Qarqeve Gjirokastër dhe Fier, si dhe të Komisariateve të Policisë Fier, Tepelenë dhe Ballsh.

Në operacionin e shpëtimit janë angazhuar gjithashtu dhe rreth 100 forca të FNSH, si dhe forca të Repartit Special RENEA. Po ashtu janë angazhuar shërbimi zjarrfikës, si dhe ai Spitalor i rretheve Fier dhe Tepelenë.

Pranë Drejtorisë së Përgjithshme të Policisë është ngritur një grup pune, i cili po koordinon gjithë veprimet e shërbimeve të policisë në vendngjarje. Ndërkohë grupi hetimor i ngritur për hetimin e kësaj ngjarje të rëndë, në përfundim të veprimeve të kryera, do të bëjë dhe zbardhjen përfundimtare të shkakut dhe të rrethanave të këtij aksidenti. /Telegrafi/