Bahtiri: Kam takime me ndërkombëtarët, ata nuk po i kuptojnë veprimet e Thaçit (Video)

Kryetari i Mitrovicës, Agim Bahtiri, ka thënë se presidenti Thaçi gaboi që shkoi në Ujman me forca speciale.

Bahtiri në “Dossier D” në RTV Dukagjini ka thënë se “ajo pjesë është tokë e jona dhe jemi në shtetin tonë”.

“Ishte dashtë të shkojë në mënyrë normale, sepse nuk ka arsye askush të kërcënoj kryetarin e shtetit të vizitojë territorin e vet. Presidenti është i lirë të vizitojë çdo pëllëmbë të shtetit”.

I pari i Mitrovicës ka thënë se sa më shumë rëndësi i jepet një vizite të tillë, u shtohet publiciteti grupeve atje se “janë dikushi”.

“Sa më shumë rëndësi që i jep ndonjë vizite të tillë, dhe shkon me njësi speciale atje, atyre (serbëve) u duket se janë dikushi, sepse vetëm me një arsenal të tillë mundet me shkue dikush atje”, tha ai përcjell Telegrafi.

Duke folur për vizitën e tij në Ujman dhe reagimeve që kishte kryeministri Haradinaj, Bahtiri tha se problemi nuk është te Ujmani, por kishte disa probleme me kryetarin e Mitrovicës së veriut.

“Unë e garantojë kryeministrin Haradinaj se nuk do të ndodhë asgjë në veri pas vizitës time dhe nuk do të ketë asnjë protestë”.

Sa i përket idesë së presidentit Thaçi për korrektim të kufijve, Bahtiri tha se kjo është shumë e rrezikshme dhe është në dëm të Kosovës.

“Me këta kufij na kanë njohur 115 vende të ndryshme të botës. Çdo ndryshim i kufijve çoftë edhe një metër katrorë na kthen mbrapa shumë vite”.

Lojëra fëmijësh, i ka quajtur ndër të tjera nënkryetari i AKR-së deklaratat e Thaçit se Kosova merr luginën e Preshëvës dhe nuk jep asgjë Serbisë.

“Të thuhet se ne dëshirojmë të marrim luginën e Preshevës e nuk do të japim asgjë, është një lojë fëmijësh”.

https://www.facebook.com/infoboxrtvdukagjini/videos/2425817064110297/

“Të thuhet se Serbia o të na njeh nëse ne marrim luginën e Preshevës dhe pa to nuk na njeh, kjo është qesharake dhe nuk dua të lëshohem më shumë në deklarata. Kryetari i shtetit duhet ta pranojë se ka gabua”.

Bahtiri ka thënë se si është e mundur që Serbia çdo gjë nga Kosova refuzon, ndërsa për këto ide nuk ka reaguar.

“Është e qartë se Serbisë po i konvenon kjo situatë”.

“Kjo që është duke bërë (Thaçi) nuk jam duke e kuptuar, as ndërkombëtarët nuk janë duke e kuptuar atë që po e bën ky njeri. Unë kam shumë takime me ta (ndërkombëtarët)”, ka deklaruar Bahtiri./Telegrafi/

https://www.facebook.com/infoboxrtvdukagjini/videos/482752618891285/