Agjenti i ri i Lewandowskit është mik i Abramovichit, sulmuesi polak drejt Chelseat

Chelsea është përpara Real Madridit dhe Manchester United në garën për të nënshkruar me sulmuesin e Bayern Munichut, Robert Lewandowskit.

Ky i fundit konsiderohet gjerësisht si një nga më të mirët në futbollin botëror në qendër të sulmit.

Bayern natyrshëm se do të mundohet ta mbaj në radhët e veta polakun që ka shënuar 139 gola për klubin, por fakti që lojtari ka ndryshuar agjentët sugjeron se po e konsideron një sfidë të re.

Agjenti i ri i Lewandowskit, Pini Zahavi është mik i pronarit të The Blues, Roman Abramovich dhe gjithashtu e ndihmoi manjatin rus për ta blerë klubin anglez në vitin 2003.

Megjithëse, Chelsea ka në radhët e veta sulmuesit Olivier Giroud dhe Alvaro Morata, asnjë lojtar nuk ka arritur të mbushë boshllëkun që ka mbetur nga largimi i Diego Costas.

Giroud deri tani ka shënuar një gol për londinezët dhe atë në Fa Cup, ndërsa Morata aktualisht është në formë të dobët dhe nuk ka arritur të gjejë rrjetën e golit në vitin 2018.

Ndryshe, Lewa deri më tani në karrierë ka shënuar 239 gola në 367 paraqitje në të gjitha garat. /Telegrafi/