Agjenti i Illan Meslier: Në të ardhmen mund ta kërkojë Real Madridi

Agjenti i portierit të Leeds United, Illan Meslier, ka thënë se klienti i tij në të ardhmen mund të tërheqë interesimin e Real Madridit, mirëpo e ka këshilluar atë që tash për tash të mos bëjë ndonjë lëvizje.

21-vjeçari e ka siguruar vendin e titullarit te klubi anglez dhe pritet që në të ardhmen të kërkohet nga klubet e mëdha.

“Kur je aq i ri, portieri më i ri startues në Evropë, padyshim që klubet e mëdha do të shprehin interesim”, ka thënë agjenti Xavier Fleury për emisionin LUFC Fan Zone.

“Illan është startues te Leeds. E do klubin. Ndoshta pas një, dy sezonesh, nëse vjen një klub si Real Madridi – kushedi? Nëse Leedsi e mban trajnerin dhe Ortan, presidenti mund të ketë të drejtë, ata mund të luajnë në Ligën e Kampionëve (në të ardhmen).

“Nëse Leeds arrijnë në Ligën e Kampionëve, Illan mund të fitojë një trofe me Leeds – të fitosh një titull me Leedsin është shumë më bukur sesa me Juventusin, Real Madridin apo Bayernin”.

“Tash për tash do të ishte ide e keqe që t’i bashkohej një klubi të madh dhe të qëndronte në bankën rezervë”, ka deklaruar agjenti i tij. /Telegrafi/